Reuters/Ipsos. Ամերիկացիների մեծ մասի կարծիքով Թրամփը տարիքի հետ ավելի անկանխատեսելի է դառնում

Reuters/Ipsos-ի նոր հարցման համաձայն՝ 10 ամերիկացիներից 6-ը, այդ թվում՝ հանրապետականների զգալի մասը, կարծում են, որ նախագահ Դոնալդ Թրամփն ավելի անկանխատեսելի է դարձել տարիքի հետ։

Reuters/Ipsos հարցումն անցկացվել է 4638 չափահասների շրջանում փետրվարի 18-ից 23-ը ընկած ժամանակահատվածում։ Վեցօրյա հարցումն ավարտվել է երկուշաբթի օրը՝ 79-ամյա նախագահի Կոնգրեսում ամենամյա ուղերձից մեկ օր առաջ։

Հարցումը ցույց է տվել՝

• հարցվածների 61%-ը կարծում է, որ Թրամփը տարիքի հետ ավելի ու ավելի անկանխատեսելի է դառնում։
• 79%-ը կարծում է, որ ընտրված պաշտոնյաները չափազանց տարեց են։
• Թրամփի վարկանիշը փոքր-ինչ աճել է՝ հասնելով 40%-ի։

Թրամփի ժողովրդականությունը վերջին ամիսներին գրեթե անփոփոխ է մնացել։ Վերջին հարցման մասնակիցների մոտ 40%-ը հավանություն է տվել Թրամփի՝ որպես նախագահի գործունեությանը, ինչը երկու տոկոսային կետով ավելի է, քան այս ամսվա սկզբին։ Նշվում է, որ պաշտոնավարման սկզբում նրա վարկանիշը զգալիորեն բարձր է եղել՝ 47%։

Թրամփը վերադարձել է նախագահի պաշտոնին 2025 թվականի հունվարին՝ 78 տարեկան հասակում։ Այդ ժամանակվանից ի վեր նա գլխապտույտ արագությամբ ներկայացրել է նոր քաղաքական որոշումներ և առաջարկներ՝ սահմանելով հսկայական մաքսատուրքեր տասնյակ երկրներից ներմուծման վրա և ամբողջ երկրում տեղակայելով դիմակավոր դաշնային գործակալներ՝ անօրինական ներգաղթի դեմ պայքարելու համար։