Ռուսաստանի թիվ 1 «օրենքով գող» դառնալուն հավակնող ադրբեջանցու նկատմամբ հետախուզում է հայտարարվել

Այս տարվա նոյեմբերի վերջին Ռուսաստանում դաշնային հետախուզում է հայտարարվել Վրաստանում ծնված, ազգությամբ ադրբեջանցի «օրենքով գող» Նադիր Սալիֆովի նկատմամբ, որը հանցավոր աշխարհում առավել հայտնի է Գուլի մականունով:

Ինչպես գրում է lenta.ru-ն՝ հղում անելով «Прайм Крайм» գործակալությանը, նրան մեղադրում են 2015 թվականին Քամալ Գուլուևի առևանգման կազմակերպման համար, որին գտնելու համար սահմանված է եղել 10 մլն եվրո պարգևավճար:

Նշվում է, որ առևանգումից հետո Գուլուևին հաջողվել է փախչել, նրա հետ միասին փախուստի է դիմել նաև առևանգման մասնակիցներից Մաքսուդ Ղուրբանովը։ Ավելի ուշ նա ցուցմունք է տվել Գուլիի դեմ: Հենց այդ տեղեկությունները հիմք դարձան հետագայում ադրբեջանցի քրեական հեղինակության դեմ առաջադրված մեղադրանքի համար:

Հատկանշական է, որ Սալիֆովը Զախարի Քալաշովի (Շաքրո Մոլոդոյ) ձերբակալությունից հետո համարվում է ռուսաստանյան թիվ 1 «օրենքով գողը» դառնալու ամենահավանական թեկնածուն: Նշենք, որ Շաքրոն ռուսաստանյան հանցավոր աշխարհի առաջնորդությունը ձեռք էր բերել Ասլան Ուսոյանի՝ Դեդ Հասանի մահից հետո:

Լրատվամիջոցները նկատում են, որ լինելով ծնունդով Վրաստանից, ազգությամբ ադրբեջանցի ու մահմեդական՝ Գուլին կարող է կարգուկանոն հաստատել ռուսաստանյան շուկաներում, ազդել հյուսիսկովկասցի իսլամիստ ծայրահեղականների, ինչպես նաև Միջին Ասիայից էթնիկ խմբավորումների պարագլուխների վրա:

Վարկածներից մեկի համաձայն՝ հետախուզում հայտարարելով Գուլիի դեմ՝ Ռուսաստանի ներքին գործերի նախարարությունն առաջարկում է Գուլիին պայմանավորվել համագործակցության շուրջ՝ նկատի ունենալով նրա հավակնությունները: