Լոնդոնի Թագավորական ռազմաօդային ուժերի ակումբում ընդունելություն՝ նվիրված Հայկական բանակի 34-ամյակին

Փետրվարի 16-ին Լոնդոնի Թագավորական ռազմաօդային ուժերի ակումբում տեղի է ունեցել ընդունելություն՝ նվիրված Հայկական բանակի 34-ամյակին և Միացյալ Թագավորությունում ՀՀ դեսպանատան պաշտպանության բաժնի պաշտոնական բացմանը:

Իր խոսքում դեսպան Վարուժան Ներսեսյանը նշել է, որ Միացյալ Թագավորությունում առաջին անգամ է Հայկական բանակի օրվան նվիրված ընդունելություն կազմակերպվում։ Նա ընդգծել է հայ-բրիտանական հարաբերություններում առկա առաջընթացը՝ հիշեցնելով երկկողմ կապերը ռազմավարական գործընկերության մակարդակի բարձրացնելու համաձայնագիրը և պաշտպանության բաժինների փոխադարձ բացումը երկու դեսպանատներում՝ որպես համագործակցության խորացման հստակ ապացույց:

Միջոցառման ընթացքում նաև տեղի է ունեցեն պաշտպանության կցորդ, գնդապետ Կարեն Մուրադյանի պաշտոնական նշանակումը։ Դեսպանը շնորհավորել է գնդապետ Մուրադյանին նշանակման կապակցությամբ և մաղթել հաջողություններ նոր պաշտոնում:

Գնդապետ Մուրադյանն իր ելույթում խոսել է ՀՀ զինված ուժերում ընթացող բարեփոխումների գործընթացի մասին և վերահաստատել է Հայաստանի հանձնառությունը զինատեսակների շարունակական արդիականացման և դիվերսիֆիկացման, Միացյալ Թագավորության և այլ միջազգային գործընկերների հետ համագործակցության ընդլայնման հարցում:

Նա ընդգծել է, որ հայկական բանակը մնում է երկրի ինքնիշխանության, տարածքային ամբողջականության և խաղաղության հիմնական երաշխավորը։

Ընդունելությանը մասնակցել են Մեծ Բրիտանիայի պաշտպանության նախարարության ներկայացուցիչներ, հայ համայնքի անդամներ։