Ուկրաինայում քննարկում են Ռուսաստանի հետ երկաթուղային հաղորդակցության դադարեցման հարցը

Ուկրաինայի ենթակառուցվածքների նախարար Վլադիմիր Օմելյանը հայտարարել է, որ Կիևում քննարկվում է Ռուսաստանի հետ երկաթուղային հաղորդակցության դադարեցման հարցը, այս մասին գրում է «112 Украина»-ն:

«Ռուսաստանի հետ երկաթուղային հաղորդակցության հարցը նախևառաջ քննարկվում է «Ուկրաինայի երկաթուղիներ»-ի («Укрзалізниця»- tert.am) կողմից: Կարծում եմ՝ վերջնական որոշման մասին մենք կկարողանանք հայտնել արդեն 2018 թվականին», - ասել է նախարարը:

Նրա խոսքով՝ Ուկրաինայի տարածքում ուղևորատար գնացքներից այս պահին գործում է միայն մեկ ռուսական գնացք, որն իրականացնում է «Քիշնև-Մոսկվա» երթուղին, կան նաև մի քանի ուկրաինական գնացքներ, որոնք երթուղիներ են իրականացնում դեպի Մոսկվա:

Օմելյանը նաև ընդգծել է, որ նման որոշման կայացման դեպքում Կիևը վնաս չի կրի։