Սաակաշվիլին պատմել է Պորոշենկոյի՝ վարչապետ դառնալու առաջարկի մասին

Վրաստանի նախկին նախագահ, Ուկրաինայի Օդեսայի շրջանի նախկին նահանգապետ Միխեիլ Սաակաշվիլին հայտարարել է, որ Ուկրաինայի նախագահ Պյոտր Պորոշենկոն իրեն առաջարկել է զբաղեցնել երկրի վարչապետի պաշտոնը: Այս մասին վրացի քաղաքական գործիչը հայտնել է Zik հեռուստաալիքի եթերում։

«Նա (Պորոշենկոն-Tert.am) անընդհատ ակնարկում էր Յացենյուկին (կառավարության նախկին ղեկավար Արսենի Յացենյուկ-Tert.am), որ հաջորդ վարչապետը ես եմ լինելու: Բայց երբ ես իմացա նրա ակնարկների մասին, ասացի՝ «Պյոտր Ալեքսեևիչ, ի՞նչ ես խոսում», իսկ նա ինձ պատասխանեց՝ «իսկ ինչո՞ւ ոչ», ես հակադարձեցի՝ «ո՛չ»,-մեջբերում է ria.ru-ն Սաակաշվիլիի խոսքը:

Հատկանշական է, որ ավելի վաղ քաղաքական գործիչը Zik հեռուստաալիքի եթերում հայտարարել էր, որ պատրաստ է դառնալ Ուկրաինայի վարչապետ:

Հիշեցնենք, որ դեկտեմբերի 12-ին Ուկրաինայի գլխավոր դատախազությունը հայտնել է, որ մտադիր է բողոքարկել դեկտեմբերի 11-ին կայացված վճիռը, համաձայն որի՝ դատարանը հրաժարվել է կալանավորել Օդեսայի շրջանի նախկին նահանգապետ Միխեիլ Սաակաշվիլիին:

Ինչպես ավելի վաղ հայտնել էր Tert.am-ը, դեկտեմբերի 11-ին Կիևի դատարանն ազատ է արձակել Միխեիլ Սաակաշվիլիին: Փաստացի դատավոր Լարիսա Ցոկոլը մերժել է դատախազության՝ տնային կալանքի մասին միջնորդությունը: Հիշեցնենք, որ Սաակաշվիլիին ձերբակալել են դեկտեմբերի 5-ին: Նա ձերբակալվել է հանցախմբերի անդամներին աջակցելու ու նրանց հանցավոր գործունեությունը քողարկելու մասին քրեական գործի շրջանակում: