ԱԱԾ–ականները չեն խոսել ինձ հետ Վեհափառի անունը չտալու հարցով. այլ հարցով են եկել. Տեր Ռուբեն

ԱԱԾ–ից ինձ մոտ եկել էին իրենց ծառայությունը կատարելու համար այն դեպքում, եթե վարչապետը այցելի մեր եկեղեցի։ Այս մասին NEWS.am–ի հետ զրույցում նշեց Գյումրիի Սուրբ Հակոբ Մծբնեցի եկեղեցու քահանա Տեր Ռուբենը՝ անդրադառնալով նրան, որ եկող կիրակի վարչապետն ուզում է պատարագի մասնակցել Գյումրիում ու իրեն ասել են, որ պատարագի ժամանակ կաթողիկոսի անունը չհնչեցնի։

«Ինքն ինձ ասել է, որ այդ հարցն է լինելու, ես էլ իրեն ասեցի, որ կարգը դա է։ Ինքն էլ ասել է՝ շատ լավ, ձեր անելիքն է, ձեր գիտելիքն է։ Ոչ հակադրություն, ոչ մի բան չի եղել, նորմալ հասկացել ենք իրար։ Այստեղ հարց բարձրացնելու կարիք չկա, ես կանոնական քահանա եմ, պատարագների ժամանակ հայրապետի անունը տրվում է, սրբազանի անունը տրվում է, պատարագիչ քահանահոր անունը տրվում է։ Դա կանոնականի մեջ է մտնում, եթե որևէ մեկի անունը չի տրվում, դա անկանոն պատարագ կհամարվի։

Կարեն ասել է՝ մարդիկ ձեզ կզանգահարեն, կգան և այլն, բայց չեն եկել։ Սաղ խնդիրը ինքն է արել, չես հասկանում ինչի համար է տենց բան արել։ Ինքն ասել է, որ տենց բան չի ասել ինձ, բայց լավ էլ ասել է, ստում է, ստախոս է ինքը։

Մեր ծառայությունը միշտ եղել է, մեր դռները բոլորի համար բաց են, մեր հարգարժան, սիրելի վարչապետը երկու տարի առաջ եղել է մեր եկեղեցում հուղարկավորության, կարող է ուզենա՝ գա մեր եկեղեցի, կարող է գնա «Յոթ վերք եկեղեցի, ուր որ կուզի կարող է գնա։ Մինչև իր գալը, այդ տեղերը որտեղ պիտի գա, ապահովում են անվտանգությունը, ամեն ժամանակ միշտ այդպես է եղել, այտդեղ որևէ հարց չկա, իրենք իրենց ծառայություն են անում»,– ընդգծեց տեր Ռուբենը։

Ինչ վերաբերում է նրան, որ Նիկոլ Փաշինյանը հայտարարել է, որ գնում է միայն այն եկեղեցիներ, որտեղ չի հնչում կաթողիկոսի անունը, նա արձագանքեց. «Լավ, բայց ինչի՞ համար է գալիս, լսելու՝ մենք տալիս ենք, թե չե՞նք տալիս անունը, թե՞ գալիս է պատարագի մասնակցելու, հոգևոր սնունդ ստանալու, կամ հաղորդություն վերցնելու, մեղքերը քավելու»։

Նշենք, որ ավելի վաղ տեր–Ռուբենը «Ազատության»–ը ասել էր, որ Գյումրիի ԱԱԾ–ականները եկել են իր հետ հանդիպել են և առաջարկել են պատարագի ժամանակ, որին կմասնակցի վարչապետը, կաթողիկոսի անունը չտալ։