Հայաստան ներմուծված սառեցված հավամթերքի շուկայում հայտնաբերվել են վտանգավոր նյութեր

Հերթական անգամ հանրային վերահսկողության արդյունքում հայտնաբերվել են խախտումներ: Այս անգամ ուսումնասիրվել է սառեցված հավամթերքի շուկան, լրագրողների հետ հանդիպմանն ասաց «Իրազեկ և պաշտպանված սպառող» հկ նախագահ Բաբկեն Պիպոյանը:

««Հետք» էլեկտրոնային պարբերականի կողմից ներկայացված՝ սառեցված հավամթերքի շուկայում գրանցված խախտումների հետքերով ենք գնացել և հերթական ցավալի պատկերն ենք արձանագրել: Ուսումնասիրության համար ընտրված 9 նմուշներից սննդում օգտագործման համար պիտանի են միայն 4-ը, 5 նմուշ սննդի համար պիտանի չէ: Հայտնաբերվել են խախտումներ ինչպես մանրէաբանական ցուցանիշների մասով, այնպես էլ գրեթե բոլոր հավերը ունեցել են մակնշման հետ կապված խնդիրներ: Հավերի մեջ նկատվել են հակաբիոտիկների մնացորդներ, ինչպես լևոմիցետինի, այնպես էլ տետրացիկլինի խմբի անտիբիոտիկներ են հայտնաբերվել»,-ասաց Բաբկեն Պիպոյանը:

Նրա խոսքով՝ նշված խախտումներն արձանագրվել են բացառապես Հայաստան ներմուծված և սառեցված հավամթերքի շուկայում, ինչպես Ռուսաստանից, այնպես էլ Բրազիլիայից ներմուծված հավամթերքում է հայտնաբերվել:

Տեղական հավի մսում նման վտանգավոր հավելումներ, ըստ Պիպոյանի, չեն հայտնաբերվել չեն էլ կարող լինել գործնականում: Բայց այս ուսումնասիրությունը լուրջ հիմք է վերահսկող մարմնի համար շուկայում փորձաքննություն անցկացնել:

«Եթե իրացման ցանցում պետական վերահսկողություն արվեր, այդ խախտումները կնկատվեին: Ամենամեծ խնդիրներից մյուսն էլ այն է, որ լիազոր մարմինը՝ ՍԱՊԾ-ն արդեն չի էլ արձագանքում, գոնե ձև համար գալիս հայտարարում էին՝ մենք կվերահսկենք։ Երկու օր է՝ լիազոր մարմնի պաշտոնական կայքում որևէ հայտարարություն վտանգավոր մթերքի մասով չկա: Ի վերջո գործադիր իշխանության բոլոր օղակները պետք է հասկանան, որ բառացիորեն մարդկանց առողջության հետ կապված լինում են խնդիրներ։ Հակաբիոտիկը, կարող է ՍԱՊԾ-ում չեն հասկանում՝ ինչ է, բայց չեմ կարծում, որ Առողջապահության նախարարությունում էլ չեն հասկանում: Բառացիորեն ամեն օր վտանգվում է մարդկանց կյանքը, առողջությունը»,-ասաց Բաբկեն Պիպոյանը:

Պիպոյանի խոսքով՝ հատկապես Երևան քաղաքում հավի սպառման ծավալներն ավելացել են ցածր գնի հաշվին և որպես փոխարինող ավելի թանկ վաճառվող տավարի, խոզի ու գառան մսի: Եթե պետական վերահսկողությունը գրեթե բացակայում է, ապա Պիպոյանի կարծիքով մնում է ապավինել հանրային իրազեկվածության բարձրացմանը:

«Այդ ապրանքն այդ վտանգներով ներմուծվել է ՀՀ տարածք ՝ անցնելով պետական վերահսկողություն, հիմա պետական վերահսկողության վրա սրանից հետո հույս դնել չի կարելի, որովհետև «դիժուրնի» հայտարարություն՝ հետևից գնալ, ինչ են պատրաստվում անել՝ չկա»,-ասաց Պիպոյանը:

Նա նաև հիշեցրեց հոկտեմբերի վերջին ՏՄՊՊՀ ուսումնասիրությունը կաթնամթերքի շուկայում հայտնաբերված բազմաթիվ կեղծված մթերքների մասին և փաստեց, որ այդ ժամանակ էլ լիազոր մարմնից համապատասխան քայլեր չարվեցին:

«Ստացել եմ տեղեկություն, որ մինչ օրս գրավոր պատասխան ՍԱՊԾ-ն չի տվել ՏՄՊՊՀ-ին: Խտացրած կաթ, հալած պանիր, թթվասեր. այս մթերքներում կեղծված ապրանքները շարունակվում են վաճառվել շուկաներում: Գնացեք իրացման ցանցում գործ արեք, որովհետև Ամանորից առաջ վտանգ ունենք»,-ասաց Բաբկեն Պիպոյանը:

tert.am