Ինչու է բենզինը 10 դրամով թանկացել

«Հայկական ժամանակ» թերթը գրում է. «ՀՀ Տնտեսական մրցակցության պաշտպանության պետական հանձնաժողովի մոնիթորինգի համաձայն՝ մայրաքաղաքի որոշ բենզալցակայաններում 10 դրամով բարձրացել է բենզինի գինը: Այս մասին «ՀԺ»-ին տեղեկացրեցին հանձնաժողովից՝ անդրադառնալով բենզինի գնի թանկացման վերաբերյալ մեր հարցին: Հանձնաժողովի փոխանցմամբ՝ 1 լիտր ռեգուլյար տեսակի բենզինը 400 դրամի փոխարեն վաճառվում է 410 դրամով:

«Քանի որ առկա են գերիշխող դիրք զբաղեցնող տնտեսվարողներ, ապա ՀՀ մրցակցային մարմինն իր լիազորությունների շրջանակում վերահսկողություն է իրականացնում այս շուկայում: Նշենք, որ ոլորտում խոշոր ընկերություններ են հանդիսանում՝ «Ֆլեշ» ՍՊԸ-ն, «Սի Փի Էս Օիլ քորփորեյշնը», ինչպես նաև «Մաքս Պետրոլ» ՓԲԸ-ն: Միջազգային շուկաներում բենզինի գնի դինամիկան, ինչպես նաև տնտեսվարողների ձեռքբերման փաստաթղթերի ուսումնասիրությունից հետո միայն հնարավոր կլինի գնահատական տալ փոփոխության վերաբերյալ»,- ասված է մեզ տրամադրված պարզաբանման մեջ:

Մեր հարցին ի պատասխան էլ «Ֆլեշ» ընկերությունից հայտնեցին, որ այսօր իրենց բենզալցակայաններում վաճառվող ռեգուլյար տեսակի բենզինի 1 լիտրն արժե 410 դրամ, իսկ պրեմիում տեսակի բենզինը՝ 430 դրամ»:

Մանրամասները՝ թերթի այսօրվա համարում