Ներդրողները դժգոհ են մնացել Թրամփի հետ 1,7 միլիոն դոլար արժողությամբ ընթրիքից

Դոնալդ Թրամփը հինգշաբթի՝ մայիսի 22-ին, Վիրջինիայի իր գոլֆի ակումբում մասնավոր ընթրիք է կազմակերպել իր $TRUMP կրիպտոարժույթի 220 խոշորագույն ներդրողների համար։ Հյուրերը, որոնք $TRUMP-ի վրա միջինում 1,7 միլիոն դոլար էին ծախսել, քննադատել են միջոցառման ժամանակ մատուցված սննդի որակը։ «Դա ամենավատ ուտելիքն էր, որ ես երբևէ կերել եմ Թրամփի հաստատությունում։ Միակ ուտելի բանը հացն ու կարագն էր», -գանգատվել է 25-ամյա Նիկոլաս Պինտոն։

Ցանկում ներառված էին «տապակած վահանաձուկ ցիտրուսային սոուսով» և «ֆիլե մինյոն (խոզի, տավարի կամ հորթի մսից պատրաստված մսային ուտեստ, նուրբ սթեյք), դեմի-գլաս (demi-glace- տավարի ոսկորներից, բանջարեղենից (երեք տեսակի սոխից՝ շալոտ, պրաս և գլուխ սոխ, գազար, մաղադանոսի արմատից), դափնու տերևներից, սև և համեմված պղպեղից ու կարմիր գինուց պատրաստված) սոուսով», սակայն չափաբաժինները չափազանց համեստ էին, իսկ սննդի որակը՝ վհատեցնող։ Հյուրերից ոմանք քաղցած են մնացել և ուտելիքը համեմատել ինքնաթիռում մատուցվող ճաշի հետ։ Կրիպտո բլոգեր Քրիս Սքինները հրապարակել է իր ափսեի  լուսանկարը՝ հետևյալ մակագրությամբ. «Ահա թե ինչ կմատուցի ձեզ 1,7 միլիոն դոլարը, գումարած կրիպտոների մասին 25 րոպեանոց մակերեսային ելույթ»։

Թրամփը ժամանել է Marine One ուղղաթիռով և հանդես եկել 23 րոպեանոց ելույթով, որի մեծ մասը կրիպտոարժույթների մասին չէր։ «Դուք հավատում եք այս կրիպտո բանին… Դա կարող է ինչ-որ յուրահատուկ բան լինել։ Ո՞վ գիտի,- ասել է նախագահը։ Ելույթից հետո նա արագ լքել է սենյակը՝ անձամբ շփվելով միայն մի քանի խոշոր ներդրողների հետ։