Զինված բախումներ Տրիպոլիում. սպանվել է նախագահական խորհրդի անվտանգության ծառայության ղեկավարը

Բախումների ժամանակ, ինչպես հայտնում է լիբիական «Ալ Վասաթ» հեռուստաալիքը, Տրիպոլիի ռազմական շրջանի կազմում գտնվող 444-րդ մարտական ​​բրիգադի շտաբում սպանվել է Կայունության աջակցության վարչության ղեկավար Աբդել Գանի ալ Քիքլին։ Reuters-ը պարզաբանում է, որ Կայունության աջակցության վարչությունը կառավարվում է նախագահական խորհրդի կողմից, որը իշխանության է եկել 2021 թվականին Ազգային միասնության կառավարության հետ ՄԱԿ-ի կողմից աջակցվող գործընթացի միջոցով։

Լիբիայի ներքին գործերի նախարարությունը քաղաքացիներին կոչ է արել մնալ տանը՝ «իրենց անվտանգության համար»: Ականատեսները պատմել են, որ կրակոցներ են լսել Աբու Սալիմ և Սալահ Էդին շրջաններում: Տրիպոլիի համալսարանի նախագահությունը հայտարարել է բոլոր դասերի, քննությունների և վարչական աշխատանքների դադարեցման մասին՝ մինչև հետագա ծանուցումը։

Լիբիայում ԱՄՆ դեսպանատունը «հանգստության» կոչ է արել Տրիպոլիում լարվածության աճի մասին լուրերի ֆոնին՝ միանալով ՄԱԿ-ի առաքելության նմանատիպ կոչին: ՄԱԿ-ի առաքելության հայտարարությունն անհապաղ դեէսկալացիայի և  «կառուցողական երկխոսության միջոցով» տարաձայնությունների լուծման կոչ է արել: