Ամերիկահայ գրող Փիթեր Բալաքյանը ու այլազգի 55 մտավորականներ նամակ են հղել Էրդողանին

Աշխարհի տարբեր երկրներից 55 մտավորական ու գիտնական, որոնց թվում է ամերիկահայ գրող Փիթեր Բալաքյանը, ամերիկացի պատմաբան Դեբորա Դուորքը, թուրք պատմաբան Թաներ Աքչամը, Ցեղասպանությունների ուսումնասիրման միջազգային ասոցիացիայի նախագահ Հենրի Թերիոլթը և այլոք, նամակ են հղել Թուրքիայի նախագահ Ռեջեփ Թայիփ Էրդողանին՝ պահանջելով ազատ արձակել երկրում կալանավորված թուրք գործարար, վերլուծաբան և հասարակական գործիչ Օսման Քավալային, այս մասին տեղեկացնում է Ստամբուլի հայկական պարբերականներից «Ակօսը»:

Նշենք, որ Քավալայի հիմնած թուրքական ամենահայտնի հրատարակչություններից «Իլեթիշիմ»-ը բազմիցս անդրադարձել է նաև Հայոց ցեղասպանությանը:

Քավալան նաև հիմնադրել ու ղեկավարում է թուրքական հայտնի «Անադոլու քյուլթուր» հիմնադրամը, որը զբաղվում է մշակութային փոխանակության ու մշակութային ժառանգության ուսումնասիրության լայնածավալ ծրագրերով Թուրքիայում, տարածաշրջանում և Եվրոպայում:

Ծնունդով Փարիզից թուրք գործիչը հովանավորել է նաև Դիարբեքիրի մշակութային տան, Պատմության հիմնադրամի ծրագրերն ու Հելսինկյան քաղաքացիական ասամբլեայի անդամ է:

Էրդողանին դիմած մտավորականները շեշտում են, որ Քավալան մեծապես նպաստել է Թուրքիայում և ամբողջ աշխարհում ժողովրդավարական սկզբունքների տարածմանն ու խաղաղության կամուրջ է հանդիսացել Թուրքիայում ապրող տարբեր էթնիկ խմբերի ներկայացուցիչների միջև:

Նամակում նաև նշվում է, որ իրենք պահանջում են Քավալայի ազատ արձակումը՝ որպես Թուրքիայի և թուրք հասարակության անկեղծ բարեկամներ և ժողովրդավարության աջակիցներ: