500 ամենաազդեցիկ մուսուլմանների ցանկում Էրդողանը 5–րդն է

Հորդանանի մայրաքաղաք Ամմանում գտնվող Իսլամական ռազմավարական հետազոտությունների թագավորական կենտրոնը հրապարակել է աշխարհի ամենաազդեցիկ 500 մուսուլմանների ցանկը՝ «500 մուսուլմաններ-2018»-ը (The Muslim 500-2018):

Ըստ թուրքական «Diken.com.tr» լրատվական կայքի՝ ամենաազդեցիկ մուսուլման գործիչ է ճանաչվել Կահիրեի «Ալ-Ազհար» համալսարանի իմամ, շեյխ Ահմադ Մուհամմեդ ալ-Թայիբը, երկրորդ տեղում է Սաուդյան Արաբիայի թագավոր Սալման իբն Աբդուլ Ազիզը, եռյակը եզրափակում է Հորդանանի թագավոր Աբդալլահ Երկրորդ Իբն Ալ-Հուսեյնը: Չորրորդ տեղում է Իրանի հոգևոր առաջնորդ այաթոլլա Ալի Խամենեին: Առաջին հնգյակը եզրափակում է Թուրքիայի նախագահ Ռեջեփ Թայիփ Էրդողանը:
Նշվում է, որ տարբեր ոլորտների բաժանված ցանկում (քաղաքականություն, գիտություն, գրականություն, տնտեսություն) Թուրքիայից ընդգրկվել են 14 գործիչներ:
Ցուցակը 2009 թվականից սկսած հրապարակվում է ամեն տարի։
Աղբյուր` Ermenihaber.am