Իսրայելական կործանիչները հարձակվել են «Հեզբոլլահի» օբյեկտների վրա Լիբանանի հարավում

Իսրայելի պաշտպանության բանակի կործանիչները հարվածներ են հասցրել շիաների «Հեզբոլլահ» զինված խմբավորման օբյեկտներին Լիբանանի հարավում։ Այս մասին տեղեկանում ենք իսրայելական բանակի մամուլի ծառայության տարածած հաղորդագրությունից:

«Գիշերվա ընթացքում ռազմաօդային ուժերը հարվածներ են հասցրել «Հեզբոլլահի» ահաբեկչական ենթակառուցվածքի օբյեկտներին Լիբանանի հարավի Բլիդայի, Յարունի և Թեյր Հարֆայի շրջաններում: Նաև Իսրայելի պաշտպանության բանակի հրետանին սպառնալիքների վերացման համար հարվածներ է հասցրել Լիբանանի հարավի այլ շրջանների»,-ասված է հաղորդագրության մեջ։