Իսլանդիայի նախագահը Կոսովոյի դեմ խաղը դիտել է երկրպագուների հետ (Տեսանյութ)

Իսլանդիայի նախագահ Գյուդվին Յոուհանեսոնը ֆուտբոլի Իսլանդիայի եւ Կոսովոյի հավաքականների միջեւ աշխարհի առաջնության ընտրական փուլի վերջին տուրի խաղը ստադիոնից դիտել է երկրպագուների հետ:

Ռեյկյավիկում կայացած խաղում Իսլանդիայի հավաքականը հաղթել էր 2:0 հաշվով եւ պատմության մեջ առաջին անգամ նվաճել աշխարհի առաջնության եզրափակիչ փուլի ուղեգիր:

Նախորդ տարի Իսլանդիայի հավաքականը մասնակցել էր նաեւ Ֆրանսիայում կայացած Եվրո-2016-ին, որում հասել էր մինչեւ քառորդ եզրափակիչ: Գյուդվին Յոուհանեսոնը Եվրո-2016-ի մի քանի խաղեր եւս դիտել էր երկրպագուների տրիբունայից:

Հիշեցնենք, որ Իսլանդիան կդառնա աշխարհի առաջնության եզրափակիչ փուլում հանդես եկած ամենափոքր բնակչությամբ երկիրը: Իսլանդիայի բնակչությունը կազմում է մոտ 330 հազար մարդ: Այդ ցուցանիշով նախորդ ռեկորդը պատկանում էր Տրինիդադ եւ Տոբագոյին (բնակչությունը՝ 1,3 միլիոն մարդ), փոխանցում է Goal.com-ը: