Ընդդիմադիր պատգամավորներին ՊՆ-ն արգելում է այցելել եռամսյա վարժական հավաքների անցկացման վայրեր

ՀՀ պաշտպանության նախարարությունն արգելել է ԱԺ «Հայաստան» խմբակցության պատգամավոր Գեղամ Մանուկյանին եւ «Պատիվ ունեմ» խմբակցության պատգամավոր Տիգրան Աբրահամյանին այցելել եռամսյա վարժական հավաքների անցկացման վայրեր։

NEWS.am-ի հետ զրույցում Տիգրան Աբրահամյանն ասաց, որ նախարարության այդ որոշումն անտրամաբանական է, որովհետեւ իրենք ՀՀ ԱԺ պաշտպանության եւ անվտանգության հանձնաժողովի անդամներ են եւ իրենց պարտականություններից մեկը վերահսկողական ֆունկցիաների իրականացումն է.

«Այդ վերահսկողական ֆունկցիան կարող է իրականացվել հատկապես անմիջական այցերի միջոցով։ Պաշտպանության նախարարության արգելքներն ուղղակի նպատակ ունեն քողարկելու այն իրական իրավիճակը, որն առկա է առաջնագծում, ինչը կապված է զորքերի հետ։ Ի հակառակ սրան՝ իշխանության ներկայացուցիչները զորամասեր մեկնելու որեւէ արգելք չունեն»։

Պատգամավորի դիտարկմամբ՝ արգելքի նպատակը նաեւ վերջին ժամանակներում եռամսյա հավաքների մասնակիցներից մի քանիսի մահվան դեպքերն են. «Իրականության առկա իրողությունների, ստեղծված իրավիճակի քողարկման նպատակ ունեցող հարց է»։

Հարցին՝ վերջին անգամ ե՞րբ է գերատեսչությունը թույլ տվել պատգամավորներին այցելել մարտական դիրք, Աբրահամյանը պատասխանեց.

«Մեկ զորամասի մեկ մարտական դիրք այցելելու թույլտվություն է եղել։ Այն դեպքում, երբ մեկ դիրք այցելելով՝ պատկեր ստանալը հնարավոր չէ։ Մեկ այցելություն էլ եղել է հունվարին՝ բանակի կազմավորման օրը, այդ օրը քաղաքական իշխանությունից բազմաթիվ դեմքեր պետք գնային եւ այդ իրավիճակում ուղղակի չէին կարող մեր մուտքն արգելել»։

Այս թեմայի առնչությամբ ֆեյսբուքյան իր էջում գրառում է արել նաեւ Գեղամ Մանուկյանը։ Նա նշել է, որ տեւական ժամանակ է՝ պաշտպանության նախարարությունը խոչընդոտներ է ստեղծում հանձնաժողովի ընդդիմադիր անդամներին այցելել մարտական հենակետեր, զորամասեր եւ առաջնագիծ։ «Դրան հակառակ, իշխանական պատգամավորների ֆոտոսեսիաների համար զորմասերը միշտ բաց են ու հասանելի։ Ի դեպ, երկարամյա այս հավաքի հետ կապված պաշտպանության նախարարության ստորաբաժանումներից արդեն երկրորդ մերժումն եմ ստանում։ Ավելի վաղ, մինչեւ հավաքը, հաշվի առնելով, որ որդուս եւս ծանուցագիր էր եկել, իսկ նա գտնվում է անազատության մեջ, դիմել էի՝ ինձ զորակոչելու խնդրանքով։ Հատուկ շեշտել էի, որ պատգամավոր լինելուս հանգամանքը հաշվի չառնեն։ Բայց կրկին ստացել էի մերժում, ուշադրություն՝ ԱԺ պատգամավոր լինելուս պատճառաբանությամբ։ Թերեւս Սուրեն Պապիկյանն իր մերժման համար ունի հիմնավոր վախ՝ այս եռամսյա հավաքը սովորական չէ, ունի քաղաքական պատճառներ ու հավաքի վայրերում կարելի է տեսնել հարյորավոր մեր հայրենակիցների, որոնց ծանուցագիր էր ուղարկվել, քանի որ նրանք մասնակցում էին Դիմադրության շարժմանը, համոզված են, որ Նիկոլը պետք է հեռանա»,- ֆեյսբուքյան իր էջում գրել է Մանուկյանը։