Քաղցկեղի դեմ դեղորայքի գները երեք-չորս անգամ ուռճացված են. գիտնականներ

Oregon Health and Science University եւ Memorial Sloan Kettering (ԱՄՆ) հետազոտողները պնդում են, որ քաղցկեղի դեղերի արտադրությունն իրականում դեղագործական ընկերությունների համար արժենում է հայտարարած գների մեկ քառորդը: Այսպես՝ դեղագործական հսկաները պնդում են, որ քաղցկեղի դեղերի՝ շուկա բաց թողնելու վրա ծախսում են 2.7 մլրդ դոլար, բայց դրա հետ մեկտեղ սովորաբար ոչ մի տեղեկատվություն չեն ներկայացնում, որը կհաստատեր նրանց բառերը:

Սակայն JAMA Internal Medicine գիտական ամսագրում տպագրված են հետազոտության արդյունքները, որի ընթացքում գիտնականները մոտավորապես հաշվել են, թե որքան է կազմում քաղցկեղի դեղերի արտադրությունը եւ շուկա արտահանելը: Պարզվում է, որ այն կազմում է մոտ 650 մլն դոլար, այսինքն՝ դեղագործական ընկերությունների հայտարարած գումարի քառորդից էլ պակաս: Այդպիսով՝ գիտնականները հաստատել են, որ քաղցկեղի դեղերի գները նշանակալիորեն ուռճացված են: Գիտնականներն այդ թվին ավելացնում են եւս 100 մլն դոլար, որը նրանք որպես շահույթ կստանային , եթե ներդնեին ֆոնդային շուկա, այլ ոչ թե դեղերի արտադրություն: Ամեն դեպքում, նույնիսկ 750 մլն դոլարն էլ շատ ավելի քիչ է, քան հայտարարված ընկերությունների կողմից հրապարակված 2.7 մլրդ-ը:

Դեռեւս 2014-ին Tufts Center-ի փորձագետները տեսանյութ էին հրապարակել, որում հայտարարել էին, որ քաղցկեղի դեմ մեկ դեղի արտադրության եւ շուկա արտահանման համար պահանջվում է 2-2,5 մլրդ դոլար: Զեկույցը հիմնված էր բացառապես գաղտնի տվյալների բազայի վրա, այդ պատճառով հնարավոր չէր ստուգել: Այդուհանդերձ, այդ թիվը սկսեցին անընդհատ մեջբերել, իսկ ոչ վաղ անցյալում, այն մեջբերեց նաեւ ԱՄՆ նախագահ Դոնալդ Թրամփը՝ այն «խելագար» որակելով:

Գիտնականները ընդգծում են, որ ԱՄՆ ամբողջ արդյունաբերությունում գրեթե ամենաբարձր շահութաբերություն ապահովում է դեղագործական ճյուղը: Իսկ դա թույլ է տալիս ենթադրել, որ դեղերի գնային քաղաքականությունը դուրս է բոլոր սահմաններից, եւ քաղցկեղի դեղերի գները մի քանի անգամ գերազանցում են դրանց արտադրության եւ հետազոտության ծախսերը:

NEWS.am Medicine