Մոսկվայի «Արարատը» կշարունակի իր գոյությունը, բայց առանց Վալերի Հովհաննիսյանի

Մոսկվայի «Արարատի» հիմնադիր ու ակումբի նախագահի պաշտոնից հեռացած Վալերի Հովհաննիսյանը պատմել է, որ ակումբը չի լուծարվի: Հովհաննիսյանի՝ ակումբի հաշվեհամարից 20 միլիոն ռուբլի յուրացնելուց հետո հայտնի էր դարձել, որ «Արարատը» լուծարման եզրին է:

«Արարատում» ամեն բան լավ է, թիմը շարունակում է իր գոյությունը, սակայն ակումբում տեղի են ունեցել փոփոխություններ: Ես դուրս եմ գալիս ակումբի ղեկավար կազմից, իսկ իմ փոխարեն գլխավոր տնօրենը կլինի Իգոր Կորոտկովը:

Ես ակումբի բաժնետոմսերի 100 տոկոսը տալիս եմ ազգին, որպեսզի Կորոտկովը զբաղվի դրանց ճիշտ բաշխումով: Ես վստահում եմ նրան:

Մեր՝ Երկրորդ լիգա դուրս գալուց հետո ակումբին օգնել է Արամ Գաբրելյանովը: Իմ հույզերի համար ցանկանում եմ ներողություն խնդրել Արամ Գաբրելյանովից, «Արարատի» երկրպագուներից, ֆուտբոլիստներից ու աշխատակիցներից: Նրանք գիտեն՝ ինչպիսի մարդ եմ ես: Ես կարող էի ավելորդ բաներ ասել, սակայն դա նրա համար, որ ակումբն օտար չէ ինձ: Հաջողություն եմ մաղթում այս թիմին:

Ցանկանում եմ նաեւ հայտնել, որ փակել եմ ինձ ուղղված բոլոր ֆինանսական պահանջները: Կարելի է ասել, որ այստեղ տեղի է ունեցել սխալ, կողմերի անհամաձայնեցվածություն: Մանրամասները կարելի է իմանալ ակումբի նոր ղեկավար Իգոր Կորոտկովից»,- Վալերի Հովհաննիսյանի խոսքը մեջբերում է «Чемпионат»-ը:

Հիշեցնենք, որ Վալերի Հովհաննիսյանը մեղադրվում է ակումբի հաշվից 20 միլիոն ռուբլի հափշտակելու մեջ: Ավելի վաղ նշվում էր, որ «Ռյազանի» դեմ սեպտեմբերի 8-ին կայանալիք տնային խաղից հետո «Արարատը» լուծարվելու է:

NEWS.am Sport