Ունիվերսիադա. Ուշուիստ Կարապետ Թևոսյանն առնվազն բրոնզե մեդալ է ապահովել

Թայվանի Թայփեյ քաղաքում ընթացող ամառային 29-րդ համաշխարհային ուսանողական խաղերում ուշուիստ Կարապետ Թևոսյանն (70 կգ) անցել է կիսաեզրափակիչ և առնվազն բրոնզե մեդալ է ապահովել։

Քառորդ եզրափակչում Թևոսյանը հաղթել է Բելառուսի ներկայացուցիչ Եվգենի Սլիպցովին, հայտնում է ՀԱՕԿ-ի պաշտոնական կայքը:

Նրանց մրցավեճի առաջին ռաունդում Բելառուսի ներկայացուցիչը հաշվի մեջ առաջ է եղել՝ 1:0: Սակայն ընդմիջումից հետո Կարապետը բացահայտ առավելություն է ստացել և մրցակիցը ստիպված հրաժարվել է մարտը շարունակելուց:

Այսօր Թևոսյանը կիսաեզրափակչում կմրցի իրանցի Ջաֆար Շիրզադեհի հետ:

Հայաստանի երկրորդ ուշուիստը՝ Հայկ Գասպարյանը (60կգ), դուրս է մնացել մրցանակային տեղի համար պայքարից, այս մասին տեղեկացնում է ՀՀ ուսանողական մարզական ֆեդերացիան:

Ավելի վաղ, ջրացատկորդ Վլադիմիր Հարությունյանին չէր հաջողվել 10 մ անհատական աշտարակացատկ մրցաձևում անցնել եզրափակիչ։ Նա վաստակել էր 342,60 միավոր։