Մեզ ասացին մնացել եք անտեր, ձեր նման անտեր․ նույն կարգավիճակում ենք. Անի Խաչատրյանը՝ «Իմ քայլին»

Քաղաքապետարանի աշխատակիցների աշխատավարձը կրկնակի բարձրացնելու վերաբերյալ նախագիծն այս պատերազմական վիճակում, այսքան հրատապ, արտահերթ նիստով բերելու նախագիծ չէր: Այս մասին, այսօր՝ հուլիսի 29-ին, Երեւանի ավագանու նիստում նշեց «Լույս» խմբակցության անդամ Անի Խաչատրյանը:

«Աշխատակիցները 2 տարուց ավել սպասում էին այս բարձրացմանը, մեկ ամիս էլ կսպասեին, որ նախագիծը գար հաջորդ հերթական նիստի օրակարգ: Դուք հրատապ բերել եք նախագիծը, որը մեղմ ասած բարոյական չի Հայաստանում տիրող իրավիճակի առաջ: Թաղապետի 400 հազար դրամ աշխատավարձը դառնում է 800 հազար, ո՞ր արժանիքի համար: Վարչական շրջանների ղեկավարների աշխատավարձը բարձրանում է 100-ից ավել տոկոսով, իսկ սովորական աշխատողներինը գուցե 30 տոկոսով: Արդյոք վարչական շրջանի ղեկավարը ավելի շատ աշխատանք է անում, քան քաղաքապետարանի սովորական վարչության պետը: Արդյո՞ք արդար է օրուգիշեր քրտնաջան աշխատող վարչության պետի ու վարչական շրջանի ղեկավարի դեպքում: Նորից կրկնեմ՝ ինչո՞ւ այսքան հրատապ, արտահերթ նիստով, ի՞նչ է տալու սա Երեւանի քաղաքացուն»,-ասաց նա:

Ի պատասխան նախագիծը ներկայացնող Լեւոն Հովհաննիսյանն ասաց. «հերթական նիստերի ժամանակ օրակարգում լինում է առնվազն 10 հարց, եւ կարծում եմ, որ նման նախագիծ, որը ենթադրում է աշխատավարձերի բարձրացում, կամ ֆոնդի վերաբաշխում, պարտադիր պետք է առանձին նիստով քննարկվի, որպեսզի ունենանք բավական ժամանակ բոլոր հարցերին պատասխանելու համար»: Նա նկատեց, որ ավագանու անդամների աշխատավարձերը չեն ավելանում, ավելանում են միայն քաղաքապետարանի աշխատակիցների աշխատավարձերը:

«Դեռեւս 2019 թվականին «Լույս» դաշինքը, չգիտեմ, թե ինչ կարգավիճակ ունի այն այսօր, առաջարկեց, որպեսզի բոլոր աշխատավարձերը բարձրանան 30 տոկոսով: Նույն ձեր գործընկերներն առաջարկում էին, որ պարգեւատրման ֆոնդը տեղափոխվի աշխատավարձ եւ տեղի ունենա բարձրացում»,-ասաց Լեւոն Հովհաննիսյանը՝ հավելելով, որ որքան հիշում է «Լույս» խմբակցությունը եւս ժամանակին կողմ է քվեարկել բյուջեի նախագծին, որտեղ նախատեսվել է պարգեւատրման ֆոնդ:

Ի պատասխան Անի Խաչատրյանը նախ հիշեցրեց, որ «Լույս» խմբակցությունը երբեք կողմ չի քվեարկել բյուջեի նախագծին, ապա հավելեց. «Մեր խմբակցության ֆորմատը նույնն է, ինչ որ ձերը՝ «Իմ քայլը» դաշինք գոյություն չունի: Մենք չենք տարբերվում: Ինչպես մի անգամ այստեղ Կենտրոն վարչական շրջանի ղեկավարը ասաց՝ մնացել եք անտեր, ձեր նման անտեր... նույն կարգավիճակում ենք: «Լույս» խմբակցության առաջարկածով բոլորի աշխատավարձը հավասարաչափ պետք է բարձրանար՝ 30 տոկոսով: Ես նախագծին կողմ եմ քվեարկելու, այո, մաքրուհիների, սովորական աշխատողների աշխատավարձները բարձրանալու համար, այլ ոչ թե իշխող խմբակցության գրպանն ուռի»: