Անհրաժեշտ է առարկայական բանակցություններ սկսել. Մամեդյարով

Եթե հայկական կողմն ընդունի, որ ԵԱՀԿ Մինսկի խմբի ամերիկացի համանախագահ Ռիչարդ Հոգլանդի ընդգծած սկզբունքները նոր չեն, այդ դեպքում անհրաժեշտ է առարկայական բանակցություններ սկսել: Այդ մասին հայտարարել է Ադրբեջանի արտգործնախարար Էլմար Մամեդյարովը Ռիչարդ Հոգլանդի վերջին հայտարարության առնչությամբ, հայտնում է «Թրենդ» գործակալությունը:

Նա նշել է, որ ԵԱՀԿ Մինսկի խմբի համանախագահ երկրների ղեկավարների հայտարարություններում արտացոլված են Հելսինկյան եզրափակիչ ակտի հիման վրա հակամարտության փուլային կարգավորման հիմնական տարրերը: «Եվ այդ տարրերը կազմում են նորացված Մադրիդյան սկզբունքների հիմքը: Այդ սկզբունքները ևս մեկ անգամ ընդգծել է ԱՄՆ-ից համանախագահ Ռիչարդ Հոգլանդը»,- ասել է Ադրբեջանի արտգործնախարարը:

Նա ընդգծել է, որ եթե հայկական կողմն ընդունի, որ այդ սկզբունքները նոր չեն, այդ դեպքում արդեն անհրաժեշտ է առարկայական բանակցություններ սկսել մանրամասների քննարկման նպատակով:

Մամեդյարովը նշել է, որ ադրբեջանական կողմը բազմիցս հայտարարել է, որ «պատրաստ է ստատուս քվոյի փոփոխության, հակամարտության շուտափույթ կարգավորման և տարածաշրջանում կայուն խաղաղության ապահովման վերաբերյալ լուրջ բանակցությունների»:

Ավելի վաղ հաղորդվել է, որ ԵԱՀԿ-ի Մինսկի խմբի ԱՄՆ-ի համանախագահ Ռիչարդ Հոգլանդը ներկայացրել է ԼՂ հակամարտության կարգավորման 6 հիմնական կետերը:

Առաջին կետում նշվում է, որ հաշվի առնելով Լեռնային Ղարաբաղի բարդ պատմությունը՝ կողմերը պետք է սահմանեն դրա վերջնական իրավական կարգավիճակը ապագայում՝ փոխադարձ համաձայնությամբ և իրավական պարտավորեցնող կամարտահայտմամբ:

«Նախկին Լեռնային Ղարաբաղի ինքնավար մարզի սահմանների մեջ գտնվող տարածքին, որը Բաքվի կողմից չի վերահսկվում, պետք է ժամանակավոր կարգավիճակ տրվի, որն առնվազն ապահովում է անվտանգության և ինքնավարության երաշխիքներ»,–ասվում է երկրորդ կետում։

Երրորդ կետով համանախագահը նշում է, որ «Լեռնային Ղարաբաղի շուրջ «գրավված» տարածքները պետք է հանձնվեն Ադրբեջանի վերահսկողությանը, և այդ տարածքների նկատմամբ Ադրբեջանի ինքնիշխանությունը պետք է վերականգնվի»:

«Պետք է լինի միջանցք, որը կմիացնի Հայաստանը Լեռնային Ղարաբաղի հետ: Այն պետք է լինի բավականաչափ լայն՝ անվտանգ փոխադրումների ապահովման համար։ Սակայն այն չի կարող ներառել Լաչինի ամբողջ շրջանը:

Հարատև կարգավորումը պետք է ճանաչի բոլոր տեղահանված անձանց և փախստականների իրավունքը՝ վերադառնալ բնակության նախկին վայր:

Կարգավորումը պետք է իր մեջ ներառի անվտանգության միջազգային երաշխիքներ, որոնք կներառեն խաղաղարար միջոցառումներ: Գոյություն չունի սցենար, որում խաղաղությունը կարող է ապահովված լինել առանց լավ նախապատրաստված խաղաղ գործողությունների, որոնք վայելում են բոլոր կողմերի վստահությունը»,-ասել է ամերիկացի համանախագահը։

ՀՀ արտաքին գործերի նախարար Էդվարդ Նալբանդյանը Tert.am-ի խնդրանքով անդրադարձել էր Լեռնային Ղարաբաղի հակամարտության կարգավորման վերաբերյալ ամերիկացի համանախագահ Ռիչարդ Հոգլանդի հրապարակած 6 կետերին:
«Ամերիկացի համանախագահը որևէ նոր բան չի ասել։ Նայեք նախորդ բոլոր հայտարարությունները, կտեսնեք նույն բաները»,-ասել էր նախարարը: