Բոլոր տեղերն էլ նույն թուրքական ապրանքն են լցնում. սեպտեմբերին ընդառաջ «Մալաթիա» տոնավաճառում առեւտուր չկա

Երեւանի «Մալաթիա» տոնավաճառում սեպտեմբերի 1-ին ընդառաջ առեւտուր չկա. աշխատակիցները ստիպված են պարտք վերցնելով տաղավարների դիմաց պահանջվող վարձավճարները վճարել: NEWS.am-ի հետ զրույցում տոնավաճառի աշխատակիցներից տիկին Անահիտը նշեց, որ ամռանն առեւտուր համարյա չի լինում, չնայած հանգամանքին, որ իրենց մոտ ապրանքի գինը համեմատաբար ավելի մատչելի է, քան այլ տոնավաճառներում ու խանութներում:

«Բոլոր տեղերն էլ նույն թուրքական ապրանքն են բերում լցնում, մոլերում ու այլ խանութներում նույն շալվարը, նասկին ավելի թանկ են վաճառում, էնտեղից առնում են, բայց մեր մոտ չեն գալիս: Առեւտուր չկա, ամբողջ օրվա ընթացում մի բան չենք կարողանում վաճառել, կամ ժողովրդի ձեռքը փող չկա, կամ էլ մեր տոնավաճառ դադարել են գալ»,-ասաց նա:

Տիկին Անահիտի խոսքով, «Մալաթիա» տոնավաճառում մեկ տարի առաջ էլ սեպտեմբերին ընդառաջ նույն իրավիճակն էր. ապրանք կար, բայց գնորդ չկար:

«Էս երկու տարի է, որ էս վիճակն է: Անցած տարի գոնե դպրոցական պայուսակները կարողանում էինք վաճառել, այս տարի դեռ չեն գալիս առնելու: Հիմնականում էս շրջանում պայուսակ ու սպիտակ վերնաշապիկներ են լավ վաճառվում, մենք էլ մատչելի գնով ենք դրել, որ գան առնեն: Տեսնենք, հույս ունենք, որ մինչեւ սեպտեմբերի 1-ն ինչ-որ բան կփոխվի, հիմա մարդիկ հանգստանում են, հնարավոր է դրա համար առեւուր չի լինում»,-ասաց նա: