Մոլդովայի նախագահը դատապարտում է Ռումինիայի հետ միավորվելու գաղափարը

Մոլդովայի նախագահ Իգոր Դոդոնը Գագուզիա կատարած այցելության ընթացքում կոչ է արել պայքարել նրանց դեմ, ովքեր մտադիր են ոչնչացնել Մոլդովայի պետականությունը՝ միացնելով այն հարևան Ռումինիային:

Դոդոնը Գագաուզիայի շրջան էր այցելել մասնակցելու Գագուզիայի ինքնավարության ստեղծման 26-րդ տարեդարձի միջոցառումներին:

1990-ի օգոստոսի 19-ին հռչակվել էր այսպես կոչված «Գագուզիա Հանրապետությունը», սակայն Քիշնևը այն հակասահմանադրական էր ճանաչել, իսկ չորս տարի անց շրջանին շնորհել էր ինքնավարության կարգավիճակ:

Ռուսամետ այս շրջանը հիմնականում բնակեցված է էթնիկ թուրք գագուզներով, որոնք խոսում են ռուսերեն և դավանում են ռուսական ուղղափառ եկեղեցուն: 2016-ին կայացած Մոլդովայի նախագահի ընտրությանը նրանց մեծ մասը քվեարկել էր ռուսամետ թեկնածու Իգոր Դոդոնի օգտին:

«Մենք միասին լինելուց բացի, այլ տարբերակ չունենք և մենք միասին պետք է պայքարենք նրանց դեմ, ովքեր ցանկանում են ոչնչացնել Մոլդովայի պետականությունը»,- օգոստոսի 19-ի երեկոյան Գագաուզիայի կենտրոն Կոմրատում կայացած տոնական միջոցառմանը հայտարարել է Դոդոնը:

Միջոցառմանը մասնակցել են նաև Մոլդովայում Ռուսաստանի և Թուրքիայի դեսպանները:

Մոլդովայի ներկայիս տարածքի զգալի մասը, մինչև 1941-45 թվականների երկորդ աշխարհամարտը պատկանել է Ռումինիային: Վերամիավորվելու գաղափարը Մոլդովայում խիստ վիճահարույց է ընկալվում:

2016-ին Ռումինիայի մայրաքաղաք Բուխարեստում Մոլդովայի հետ միավորվելու ցույցը վերածվել էր բռնությունների:

azatutyun.am