Իսպանիայում 8 մարդուց բաղկացած ահաբեկչական ցանց է գործում

Իսպանիայի իշխանությունները կարծում են, որ երկրի տարածքում 8 մարդուց բաղկացած ահաբեկչական ցանց է գործում, որն օգոստոսի 17-ին ահաբեկչական ակտ է իրականացրել Բարսելոնայում: Այս մասին հայտնում է Reuters-ը՝ հղում անելով երկրի արդարադատության նախարարության աղբյուրին:

Աղբյուրի խոսքով՝ ահաբեկիչները մտադիր են եղել այլ ահաբեկչական ակտեր էլ իրականացնել՝ օգտագործելով բութանով կանիստրներ:

Կատալոնիայի ներքին գործերի նախարարի խորհրդական Խոակին Ֆորնի հաղորդմամբ՝ քննությունը դիտարկում է վարկածը, որ ահաբեկիչները ցանկացել են նման կանիստրներ օգտագործել Բարսելոնայի ահաբեկչության ժամանակ:

Հայտնի է, որ բութանը յուրօրինակ հոտով անգույն դյուրավառ գազ է: Դրա ներշնչումն առաջացնում է հալյուցինացիաներ, շնչահեղձություն և սրտի առիթմիա:

Ինչպես ավելի վաղ հայտնել էր Tert.am-ը, օգոստոսի 17-ին Բարսելոնայի մարդաշատ փողոցներից մեկում միկրոավտոբուստը վրաերթի է ենթարկել հետիոտների ամբոխին՝ խլելով 13 մարդու կյանք: Ավելի ուշ քաղաքի մեկ այլ հատվածում մեքենան վրաերթի է ենթարկել ոստիկաններին: Ենթադրվում է, որ տվյալ հարձակումն առնչություն ունի Բարսելոնայի կենտրոնում տեղի ունեցած ահաբեկչության հետ։
Բացի այդ, նույն օրը՝ օգոստոսի 17-ին, կատալոնական Ալկանար քաղաքում որոտացել է 2 պայթյուն, ինչի հետևանքով տուժել են ոստիկաններ:
Ավելի ուշ Բարսելոնայից դեպի հարավ ընկած Կամբրիլս քաղաքում ահաբեկիչների ևս մի խումբ փորձել է կրկնել Բարսելոնայի ահաբեկչությունը՝ ֆուրգոնով վրաերթի ենթարկելով մարդկանց: Նրանց գործողությունների հետևանքով տուժել է 6 մարդ, մինչդեռ 5 հարձակվողները սպանվել են:
Ոստիկանությունը ենթադրում է, որ կատարված բոլոր հարձակումները փոխկապակցված են:

tert.am