Սկանդալ Ադրբեջանում. այս անգամ էլ լատվիացիներն են «խլել իրենցից Աղդամը»

Ադրբեջանական լրատվամիջոցներում մեծ աղմուկ է բարձրացել այն բանի պատճառով, որ լատվիական «Amber Beverage Group - Latvijas balzams» ընկերությունն արտադրում է «Agdams» պորտվեյնը:

Բանն այն է, որ լատվիական ընկերության կողմից արտադրվող գինու անվանումը համընկնում է ԽՍՀՄ-ի ժամանակաշրջանում Ադրբեջանում արտադրվող «Агдам» գինու անվան հետ: Նման փաստը, ըստ ադրբեջանական փորձագետների՝ ապօրինի է դարձնում լատվիական ընկերության կողմից արտադրվող գինին: Ադրբեջանական կողմը պնդում է, որ գինուն նման անվանում տալուց առաջ «Amber Beverage Group - Latvijas» balzams» ընկերությունը պետք է թույլտվություն ստանար Ադրբեջանից, քանի որ «Агдам» անվանում հանդիսանում է Ադրբեջանի սեփականություն:
Ադրբեջանական լրատվամիջոցներից մեկը պարզել է Ադրբեջանի ստանդարտացման, չափագիտության և արտոնագրերի պետական կոմիտեում, որ 2007 թ.-ին ադրբեջանական «Aqro-Azerinvest»-ը պատենտավորել է «Агдам» անվանումը, ինչն անհնար է դարձնում լատվիական ընկերության կողմից «Agdams» գինու արտադրությունը:

«Aqro-Azerinvest»-ում, սակայն, հայտարարել են, որ «աշխարհի ցանկացած ընկերություն կարող է անվանել իր ապրանքն այս կամ այն քաղաքի կամ տարածաշրջանի անունով, այնպես որ որևէ իրավական խնդիրներ «Agdams» գինու արտադրության հետ կապված չկան»:
Ադրբեջանական կայքը հարցում է ուղարկել նաև «Amber Beverage Group - Latvijas balzams»-ին, որտեղից բավականին հստակ պատասխան է ստացել, որ «Agdams» պորտվեյնը ստեղծված է Լատվիայի տեխնոլոգների կողմից:
Ընկիերության՝ կոմունիկացիայի գծով մենեջերներ Դանա Հասանը նաև հայտնել է, որ նման անվանումով գինին շատ հայտնի էր խորհրդային տարիներին, և այն արտադրվում էր բազմաթիվ երկրներում, այդ թվում նաև Լատվիայում, սակայն պատրաստման եղանակն ու հումքն ամեն կազմակերպությունում տարբեր էր:
««Agdams»-ը պորտվեյն է, որը մենք արտադրում ենք մեր պատրաստման եղանակով: Արտադրության մեջ մենք օգտագործում ենք իսպանական հումք: Այդ գինին վաճառվում է Լատվիայի տարածքում և արդեն քանի տարի է՝ ամենավաճառվող ալկոհոլային խմիչքների տասնյակում է: Այնպես որ, «Agdams»-ը մեր ռեցեպտուրան է», - հայտարարել է Հասանը:
Zham.am