Թուրքիայում ավելի քան 500 ռուս զբոսաշրջիկ բողոքել է ինքնազգացողության վատթարացումից

ՌԴ սպառողների իրավունքների պաշտպանության ոլորտում հսկողություն իրականացնող «Ռոսպոտրեբնադզոր» դաշնային ծառայությունը թուրքական հանգստավայրերից ստացել է ինքնազգացողության վատթարացման մասին ավելի քան 500 բողոք. հիվանդների մեծ մասը մինչև 14 տարեկան երեխաներ են: Այս մասին հայտնում է РИА Новости-ն՝ հղում անելով «Ռոսպոտրեբնադզոր»-ին:

«Հատուկ բացված «թեժ գծի» շրջանակներում ստացվել է թուրքական հանգստավայրերում գտնվելու ժամանակ ինքնազգացողության վատթարացման մասին ավելի քան 500 բողոք: Հիվանդությունների դեպքերն արձանագրվել են Սիդե, Ալանիա, Բելեկ, Կեմեր և այլ քաղաքների հյուրանոցներում», - ասվում է «Ռոսպոտրեբնադզոր»-ի հայտարարությունում:

Ավելի վաղ ԶԼՄ-ները հայտնել են, որ Թուրքիայում աճում է Կոկսակի վիրուսով հիվանդ զբոսաշրջիկների թիվը, հաղորդվել է նաև, որ տասնյակ հանգստացողներ ստիպված են եղել դադարեցնել իրենց հանգիստը:

Թուրքիայի առողջապահության նախարարությունը հերքել է համաճարակի մասին ԶԼՄ-ների հաղորդագրությունները և դրանք սպեկուլյատիվ անվանել:

Հիշեցնենք, որ «Ռոսպոտրեբնադզոր»-ը վտանգավոր է ճանաչել Թուրքիայում՝ Անթալիայի շրջանում, զբոսաշրջիկների համար պայմանները: Այդ որոշումը համաձայնեցվել է երկրի ԱԳՆ-ի հետ, փաստաթուղթն ուղարկվել է զբոսաշրջության հարցերով «Ռոստուրիզմ» դաշնային գործակալություն: