Հս. Կորեայից հնչող սպառնալիքների ֆոնին Ճապոնիան հրթիռային համակարգեր է տեղակայել Տոկիոյի կենտրոնում (լուսանկարներ)

Հյուսիսային Կորեայի կողմից Գուամ կղզու ամերիկյան ռազմաբազաները հրթիռակոծելու սպառնալիքից հետո Ճապոնիայի իշխանությունները հրթիռային համակարգեր են տեղակայել Տոկիոյի կենտրոնում:

Ինչպես նշում է The Daily Mail-ը, ստորև ներկայացված լուսանկարներում երևում է, որ PAC-3 Patriot հրթիռային համակարգերն արդեն տեղում են: Ճապոնական իշխանությունների համաձայն՝ իրենք պատրաստ են հարվածել հյուսիսկորեական հրթիռներին, եթե դրանք անցնեն երկրի օդային տարածքով:

Նախկինում Տոկիոն նախազգուշացրել է, որ ոչ մի դեպքում սադրանք չի հանդուրժի ու կհարվածի հյուսիսկորեական հրթիռներին, եթե դրանք անցնեն երկրի վրայով:

Ճապոնիայի պաշտպանության նախարար Իցունորի Օնոդերան հայտարարել է, որ Փհենյանի հրթիռային հարձակումը սպառնալիքի տակ կդնի Ճապոնիայի՝ որպես պետություն գոյությունը:

Բրիտանական պարբերականը հավելում է, որ Կորեական թերակղզու շուրջ ստեղծված լարված իրավիճակի պատճառով վերջին ամիսներին Ճապոնիայում կտրուկ ավելացել է ստորգետնյա թաքստոցների պահանջարկը:

 Կորեայի կենտրոնական հեռագրային գործակալությունը տարածել է Հս. Կորեայի ազգային բանակի բարձրաստիճան ներկայացուցիչներից մեկի հայտարարությունը, համաձայն որի՝ Փհենյանն ուսումնասիրում է ցանկացած պահի գործողության միջին և մեծ շառավիղով «Հվասոն -12» հրթիռներով Գուամ կղզում Միացյալ Նահանգների ռազմաբազաներին հարվածելու վերաբերյալ ծրագիրը:
Հարվածները կարող են հասցվել՝ այդ թվում նաև ԱՄՆ ռազմական օդուժի «Անդերսոն» բազային, որտեղ գտնվում են «Հյուսիսային Կորեայի նյարդերի վրա ազդող» ռազմավարական ռմբակոծիչները:

Հայտարարության համաձայն՝ ուսումնասիրվող ծրագիրը շուտով կներկայացվի երկրի ղեկավար Կիմ Չեն Ընին, իսկ հետո այն կարող է ցանկացած պահի «պրակտիկորեն կիրառվել, եթե Հյուսիսային Կորեայի միջուկային ուժերի գերագույն գլխավոր հրամանատար Կիմ Չենը Ընը որոշում կայացնի»:

tert.am