ԱՄՆ-ի հետ լարվածության ֆոնին տասնյակ հազարավոր հյուսիսկորեացիներ իրենց հավատարմությունն են հայտնել Կիմ Չեն Ընին (լուսանկարներ)

ԱՄՆ նախագահ Դոնալդ Թրամփի՝ Հյուսիսային Կորեայի «գլխին կրակ ու ցասում թափելու» սպառնալիքից հետո տասնյակ հազարավոր հյուսիսկորեացիներ մասնակցել են հանրահավաքի ու իրենց հավատարմությունը հայտնել ղեկավար Կիմ Չեն Ընին:

Ինչպես նշում է The Daily Mail-ը, բնակիչները հավաքվել են մայրաքաղաք Փհենյանում՝ Կիմ Իր Սենի անվան հրապարակում: Նրանք պահել են քարոզչական պաստառներ ու ողջունել Կիմ Չեն Ընին:

Աղբյուրը մանրամասնում է, որ հավաքի մասնակիցները եղել են շարքային աշխատավորներ՝ հիմնականում հագած սպիտակ վերնաշապիկներ: Մինչդեռ երկրի քաղաքական էլիտան եղել է սևազգեստ ու ծափահարել է ժողովրդին:

 Կորեայի կենտրոնական հեռագրային գործակալությունը տարածել է Հս. Կորեայի ազգային բանակի բարձրաստիճան ներկայացուցիչներից մեկի հայտարարությունը, համաձայն որի՝ Փհենյանն ուսումնասիրում է ցանկացած պահի գործողության միջին և մեծ շառավիղով «Հվասոն -12» հրթիռներով Գուամ կղզում Միացյալ Նահանգների ռազմաբազաներին հարվածելու վերաբերյալ ծրագիրը:
Հարվածները կարող են հասցվել՝ այդ թվում նաև ԱՄՆ ռազմական օդուժի «Անդերսոն» բազային, որտեղ գտնվում են «Հյուսիսային Կորեայի նյարդերի վրա ազդող» ռազմավարական ռմբակոծիչները:

Հայտարարության համաձայն՝ ուսումնասիրվող ծրագիրը շուտով կներկայացվի երկրի ղեկավար Կիմ Չեն Ընին, իսկ հետո այն կարող է ցանկացած պահի «պրակտիկորեն կիրառվել, եթե Հյուսիսային Կորեայի միջուկային ուժերի գերագույն գլխավոր հրամանատար Կիմ Չենը Ընը որոշում կայացնի»:

Հյուսիսային Կորեայի ղեկավար Կիմ Չեն Ընը սպառնացել է գերհզոր կանխարգելիչ հարված հասցնել Միացյալ Նահանգներին՝ այդ երկրի կառավարությանը նախազգուշացնելով «գործ չունենալ իրենց հետ»:

Այնուհետև պետական լրատվամիջոցները հայտարարել են, որ Հյուսիսային Կորեան կարող է հաշված վայրկյանների ընթացքում երկրի երեսից ջնջել ԱՄՆ-ն ու իր թշնամուն մոխրի վերածել:

Միացյալ ազգերի կազմակերպությունում Հյուսիսային Կորեայի ներկայացուցիչ Կիմ Ին Ռյոնն ԱՄՆ-ին մեղադրել է Կորեական թերակղզում լարված իրավիճակ ստեղծելու համար՝ նախազգուշացնելով, որ ցանկացած պահի կարող է ջերմամիջուկային պատերազմ սկսվել:

Կիմ Ին Ռյոնի նախազգուշացմանը նախորդել էր ԱՄՆ փոխնախագահ Մայք Փենսի հայտարարությունն առ այն, որ դաշնակից Ճապոնիայի և Հարավային Կորեայի անվտանգությունն ապահովելու համար Վաշինգտոնը պատրաստ է ամեն ինչի՝ չբացառելով կանխարգելիչ հարված հասցնելու հավանականությունը: Փենսը նաև նշել էր, որ ԱՄՆ-ն ցանկանում է, որ Հյուսիսային Կորեան սառեցնի միջուկային ծրագրի զարգացումը:

tert.am