Կայանման հետ կապված հարցի շուրջ վիճաբանության ընթացքում 2 անձի դանակահարելու մեջ մեղադրվող երիտասարդը դիմել է Վերաքննիչ

Երկու անձի դանակահարելու մեղադրանքով 5 տարվա ազատազրկման դատապարտված 20-ամյա Վահան Այվազյանը Վերաքննիչ դատարան է դիմել, նա պահանջում է բեկանել Առաջին ատյանի դատավճիռը եւ ավելի մեղմ պատիժ նշանակել ու վերջնական պատիժը պայմանականորեն չկիրառել։ NEWS.am-ը Դատական տեղեկատվական համակարգից տեղեկանում է, որ Վահան Այվազյանին մեղադրանք է առաջադրված երկու անձի դանակահարության, մեկի առողջությանը դիտավորությամբ՝ ծանր, մյուսի առողջությանը դիտավորությամբ միջին ծանրության վնաս հասցնելու համար՝ ՀՀ քրեական օրենսգրքի 112 հոդվածի 1-ին և 113 հոդվածի 1-ին մասերով:

Ըստ մեղադրանքի՝ 2015 թվականի հուլիսի 18-ին, գիշերվա ժամը 1-ի սահմանում Արշակունյաց պողոտայի 6-րդ շենքի հարակից ավտոտնակների մոտ մեքենայի կայանման հետ կապված հարցի շուրջ վիճաբանության ընթացքում Վահան Այվազյանը դանակով հարվածներ է հասցրել նույն շենքի բնակիչ Սուրեն Մ.-ին ու նրա ընկերոջը՝ Էդգար Ս.-ին: Սուրենին պատճառվել են ձախ բազկի շրջանի կտրած, եռագլուխ մկանի վնասումով կտրած-ծակած վերքեր, արտաքին ու ներքին արյունահոսությամբ զուգորդված՝ կրծքավանդակի ու որովայնի համակցված , հետորովայնամզային տարածության արյունահավաքով, ստոծանու ձախ գմբեթի, հաստ աղու, փայծաղային անկյան՝ աղու լուսանցք թափանցումով՝ թափանցող, կտրած-ծակած վերքեր, նրա առողջությանը պատճառվել է ծանր վնաս՝ կյանքին վտանգ սպառնացող: Տուժող Էդգար Ս-ին պատճառվել է կրծքավանդակի աջ կեսի ծակած-կտրած, չթափանցող վերք՝ առողջության միջին ծանրության վնաս:

Ամբաստանյալ Վահան Այվազյանը դատարանում իրեն մեղավոր չի ճանաչել մեղսագրված արարքների համար ու հրաժարվել է ցուցմունքներ տալուց:

Վահան Այվազյանը մեղավոր է ճանաչվել մեղսագրված արարքների համար՝ ՀՀ քրեական օրենսգրքի 112 հոդվածի 1-ին և 113 հոդվածի 1-ին մասերով, ու վերջին հաշվով դատապարտվել է 5 տարի ազատազրկման: