Մարդը պետք է կամք ունենա, ոչ թե ժելեի նման լինի, որ ով ձեռքը սեղմի, այդ ձեւն ընդունի. Արա Զոհրաբյանը՝ ՀՀ նախագահի մասին

ՀՀ նախագահը փոխանակ երկու լուրջ սահմանադրական մարմինների՝ վարչապետ եւ ԶՈՒ գլխավոր շտաբ, միջեւ վեճը տեղափոխի քաղաքական հարթակ, նա փաստորեն հրաժարվում է այդ գործիքից եւ բոլորս թողնում բախտի քմահաճույքին: Այս մասին ՀՀ նխագահի նստավարի մոտ տեղի ունեցած ակցիայի ժամանակ նշեց Փաստաբանների պալատի նախագահ Արա Զոհրաբյանը:

Նշենք, որ 5 քաղաքացիներով (Ռոման Գասպարյան, Ռուբեն Մելքոնյան, Զինավոր Մեղրյան, Վահագն Չախալյան եւ Արա Զոհրաբյան) նրանք դիմել են ՀՀ նախագահին եւ պահանջում են, որ Արմեն Սարգսյանը դիմի ՍԴ՝ ԶՈւ ԳՇ պետին ազատելու վերաբերյալ առաջարկը Սահմանադրությանը հակասող ճանաչելու պահանջով։

«Հիմա պատկերացրեք, ենթադրենք ԳՇ պետին ազատեցին պաշտոնից, եւ մյուս բարձրաստիճան սպաները չենթարվեցին վարչապետին, ի՞նչ է տեղի ունենալու: Բնական է, որ այս հետեւանքներն արձանագրել է նաեւ ՀՀ նախագահը՝ գրելով, որ սահմանադրական կարգին սպառնացող վտանգներ կարող են լինել: Հիմա այսքան հեռատեսություն ունեցող մարդն ինչու է կեցվածք փոխում: մենք այս պահանջը գրավոր ենք ներկայացնում, որի վերջում գրել ենք՝ այսօր դիմել ՍԴ զինված ուժերի գլխավոր շտաբի պետին ազատելու վերաբերյալ վարչապետի առաջարկությունը Սահմանադրությանը հակասող ճանաչելու պահանջով:

Եթե նախագահն այսօր չդիմեց ՍԴ, մենք կոնկրետ նախաձեռնողներս փորձելու ենք բացահայտել նախագահի վախերը, ինչից ելնելով է նա վախենում վարչապետից: Ինչն է խնդիրը, որ նա փոխեց իր կարծիքը: Արդյոք իրենից կրկին քաղաքացիության մասին փաստաթուղթ ուզեցին»,-ասաց Արա Զոհաբյանը:

Նա հավելեց, որ եթե նախագահը չդիմի ՍԴ, դա հիմք կլինի պաշտոնանկության գործընթաց սկսելու համար. «Սա կոպիտ խախտում կլինի: Եթե նախագահը չարտահայտեր, որ սա առերեւույթ հակասում է Սահմանադրությանը, եւ չասեր, որ սա կարող է բերել այս հետեւանքներին, միգուցե ես կասեի՝ միգուցե նախագահն այդպես է մտածում, ստորագրեց հրամանագիրը եւ վերջ: Բայց հիմա, երբ նախագահն արդեն արտահայտել է իր դիրքորոշումը, ստացվում է, որ նա ումից ավելի շատ է վախենում, նրա կո՞ղմն է բռնում: Մարդը պետք է կամք ունենա, ոչ թե ժելեի նման լինի, որ ով ձեռքը սեղմի, այդ ձեւն ընդունի»,-ասաց ՓՊ նախագահը:

Նա հիշեցրեց, որ ՀՀ նախագահն ինքն էլ է պահանջել վարչապետի հրաժարականը, իսկ այսօր վարչապետի հետ համագործակցող քայլեր է անում:

Հարցին, թե արդյոք համոզված է, որ եթե նախագահը դիմի ՍԴ, ՍԴ-ն հակասահմանադրական կճանչի վարչապետի առաջարկությունը, Արա Զոհրաբյանը պատասխանեց. «ՍԴ-ն հարթակ է, որտեղ քաղաքակիրթ ձեւով լուծում է տրվում: Ես չեմ ասում, որ ՍԴ-ն չի բռնելու վարչապետի կողմի: Առերեւույթ, ես էլ եմ կարծում, որ կա հակասություն, վիճելի խնդիր է եւ այս պայմաններում ոչ թե պետք է թողնել, որ մարդիկ ձեռքի ուժով հարցը լուծեն, այլ խնդիրը տանել քաղաքակիրթ ճանապարհով: Եթե ՍԴ-ն ասի՝ այո, կա խախտում, կստացվի, որ ԳՇ-ն ճիշտ կեցվածք ունի: Իսկ եթե ՍԴ-ն ասի՝ չկա խախտում, միգուցե մեր բարձրաստիճան սպաները իրենց վարքագիծը փոխեն: Կարող է նաեւ չփոխեն»:

ՓՊ նախագահը հստակ պատասխան չտվեց, թե արդյոք ինքը կընդունի ՍԴ ցանկացած որոշում՝ նշելով. «Ցանկացած դատական ակտի դեպքում օրենսդիրը ստիպում է, որ դատարանը պատճառաբանի իր որոշումը, որովհետեւ այդտեղ դուք տեսնում եք, որ դատարանը, որ այդ հետեւությանը եկել է, ինչ փաստերի եւ իրավական նորմերի վերլուծությամբ է եկել:Եթե այդ պատճառաբանությունը համոզիչ լինի՝ կվստահեմ, իսկ եթե ոչ՝ չեմ կարող ասել»: