Բարոյակա՞ն մարդ է արդյոք Էդմոն Մարուքյանը

Եթե նախկին ու ներկա իշխանությունների միջև ընտրություն կատարելու հարց առաջանա, ապա «միամիտ լոռեցու» բրենդի տակ վանքի հավերն ուտող Էդմոն Մարուքյանը կընտրի նախկիններին։ Քանզի և՛ նախկինում, և՛ հիմա ինքը իշխանությունների հաճախորդն է եղել, բայց նախկինները Էդմոնին Նիկոլի պես չէին փչացնում, չէին շահագործում, չէին հանում ֆեյսբուքյան հանդերում «ատռաբատիված» անելու։

Ե՞լք, թե՞ մուտք

Նիկոլ Փաշինյանի հետ հանդիպելուց հետո Էդմոնը ձայնը գլուխն է գցել։ Ասում է՝ եկեք Նիկոլի սրտի ուզած սցենարով գնանք արտահերթ խորհրդարանական ընտրությունների։

Ընդորում՝ Էդմոնը Նիկոլի փոխարեն երաշխավորում է, թե բա գործող վարչապետը չի կեղծի ընտրությունները, քանզի ձեռքից ոչ մի բան չի գալիս, էլ ուր մնաց, թե ընտրություն կարողանար կեղծել։ Վանքի հավերի սիրահար շուստրի–հարիֆ Էդմոնին թվում է, թե բոլորն իր պես շուստրի են։

Ախր, ինչպե՞ս կարելի է բացառապես կեղծիքներով ու ստախոսությամբ զբաղվող ու խաբեությամբ կառավարող Նիկոլի մասին ասել, որ չի կեղծելու, քանի որ չի բեջարում։ Երբ իրեն պետք է լինում, լավ էլ կեղծում է Նիկոլը։ Պաթոլոգիկ ստախոսի համար ինչպե՞ս կարելի է երաշխավորել։ Միայն ավարտված հաճախորդը նման բան կանի։

Էդմոնը ֆեյսբուքյան տռաս է դուրս եկել ու հայտարարում է, թե բա Հայաստանի պատմության մեջ միակ չկեղծված ընտրությունը եղել է 2018–ին։ Փաստորեն, Էդմոնը նախ ընդունում է, որ մինչև 2018–ի ընտրությունները կեղծվել են և հետևաբար՝ ինքը կեղծիքների օգնությամբ է հայտնվել ԱԺ–ում կամ առնվազն նախկինները դեմ չեն եղել, որ ինքը դառնա պատգամավոր (Էդմոնը մինչև հիմա ուզում է ապացուցել, որ առանձին վերցրած մեկ քաղաքի մեկ ընտրատեղամասում ժողովրդավարության կղզյակ է եղել․ ա՛յ, ա՛յ, ա՛յ)։

Բացի այդ՝ ո՞վ է ասել, որ 2018–ի ընտրությունները չեն կեղծվել։ Բա եթե չեն կեղծվել, ապա Էդմոնի «Լուսահոգի» կուսակցությունն ի՞նչ գործ ունի խորհրդարանում։ Այո՛, կար էյֆորիա, Նիկոլին լիքը զոմբի ձայն էր տալիս, բայց Էդմոնի կուսակցության պահով էլ հո չկա՞ր էյֆորիա։ Ինչո՞ւ պետք է ընտրողը 2018–ին ձայնը տար մի կուսակցության, որը մինչև վերջ պայքարում էր Նիկոլի դեմ, իսկ հենց նա վարչապետ դարձավ՝ անմիջապես դարձավ թունդ հեղափոխական։

Օդում կախված համառ խոսակցություններ են պտտվում, որ Էդմոնի կուսակցությանը 2018–ի արտահերթի ժամանակ խորհրդարան է անցկացրել Նիկոլը։ Դրա համար էլ հետն ինչ ուզում անում է՝ Սասունի միջոցով չափալախում է, կոշիկները Էդմոնի խմբակցության վրա է մաքրում, հրապարակային ինքնանվաստացման ակցիաներ է պարտադրում Էդմոնին և այլն։

Դատելով ամենից՝ Էդմոնը հույս ունի, որ էս անգամ էլ ծառայություններ մատուցելով Նիկոլին՝ կրկին կանցնի խորհրդարան։ Դրա համար էլ հայտարարում է, թե բա չի կեղծի։

Մի բան է՝ ստիպված լինես Նիկոլի կազմակերպած ընտրությանը և ձգտես բռնես նրա կեղծարար ձեռքը, մեկ այլ բան՝ էս գլխից հայտարարես, որ Նիկոլը կեղծիք չի անելու, ժողովո՛ւրդ, արդար է, խաղացեք ու շահեք։

«Սագագողը»

Արցախի պետականությունը կեղծիքներով ու «Հաղթելու ենք» կարգախոսով ոչնչացրած Նիկոլին Էդմոնը վստահում է քվեաթերթիկ հաշվելու գործը։ Բա որ ասում ենք՝ հաճախորդ, ինչո՞ւ է նեղանում։ Հաճախորդը հենց այսպիսին է լինում, հո պոզով ու պոչով չի՞ լինում։

Միայն հաճախորդը կարող է հայտարարել, որ եթե բախումներ լինեն ու արյուն հեղվի, ապա Նիկոլը մասամբ է պատասխանատու լինելու դրա համար։ Ընդդիմությունն էլ է մեղավոր լինելու, քանզի չի ուզում Թուրքիայի աջակցությունը վայելող Նիկոլի պայմանները բավարարել։

Հայտնի ֆիլմի ոճով ասած՝ բարոյակա՞ն մարդ է Մարուքյան Էդմոնը։ Ո՛չ, նա բարոյական մարդ չէ։ Նա ընդամենը «սագագող» է, Նիկոլի հաճախորդ ու մանր կոմերսանտ։

7or.am