Քոչարյանի եւ մյուսների գործով դատական նիստը հետաձգվել է

Հայաստանի երկրորդ նախագահ Ռոբերտ Քոչարյանի եւ մյուսների գործով փետրվարի 23-ի դատական նիստը տեւել է կես ժամից պակաս եւ ամբողջությամբ նվիրվել է նախկին փոխվարչապետ Արմեն Գեւորգյանի փաստաբան Էրիկ Ալեքսանյանի բացակայությանը:

Հիշեցնենք, որ փետրվարի 16-ի նիստում Ալեքսանյանը դատարանին խնդրել էր հաջորդ նիստը փետրվարի 23-ին չնշանակել, քանի որ այդ ժամին ինքը նիստի պետք է մասնակցի Վերաքննիչ դատարանում, ընդ որում՝ ուղղակիորեն դատավոր Աննա Դանիբեկյանին առնչվող գործով: Դատավորն անտեսել էր խնդրանքը եւ նիստը նշանակել նշված օրը:

Նիստն ուշացումով սկսելով եւ 20 րոպեանոց ընդմիջում հայտարարելով՝ պարզելու համար Ալեքսանյանի գտնվելու վայրը, դատավոր Աննա Դանիբեկյանը, նիստը շարունակելով, հայտնեց, որ Վերաքննիչ դատարանի նիստը չի կայացել, ուստի Ալեքսանյանը հանգիստ կարող էր դատարան ներկայանալ, ասենք՝ 13:20-ին: Այս կապակցությամբ դատավորը հայտարարեց, որ փաստաբանի բացակայությունն անհարգելի է համարում եւ նրա պահվածքը կքննարկվի հաջորդ նիստում:

Դատավորը կողմերին հնարավորություն ընձեռեց դիրքորոշում հայտնելու իրավիճակի վերաբերյալ:

Դատախազ Գեւորգ Բաղդասարյանը օգտվելով ընձեռված հնարավորությունից եւ կարգի խախտմամբ՝ փաստաբան Ալեքսանյանին մեղադրեց չարամտության մեջ, որից հետո ավելի հեռու գնաց եւ հայտարարեց, որ նման պահվածքը պաշտպանական կողմի վարքագծի տարրերից մեկն է: Նա հայտարարեց, որ այս կապացությամբ մեղադրող կողմը հաջորդ նիստին կոնկրետ միջնորդություն կներկայացնի:

Ասվածը հարուցեց պաշտպանական կողմի վրդովմունքը: Փաստաբան Արամ Վարդեւանյանը հիշեցրեց, որ անընդունելի է Ալեքսանյանի բացակայությանը գնահատականներ տալը: Իսկ այն փաստը, որ նա դեռեւս մեկ շաբաթ առաջ խնդրել էր նիստը չնշանակել փետրվարի 23-ին, ինչպես նաեւ նախօրեին կրկնել էր հաղորդագրությամբ, որ չի կարող նիստին մասնակցել, վկայում է բարի մտադրությունների եւ պրոֆեսիոնալիզմի բարձր մակարդակի մասին:

Փաստաբան Միհրան Պողոսյանը հետաքրքրվեց, թե դատավորը ինչո՞ւ նիստը մեծ ուշացումով սկսեց: «Արդյոք ոչ ա՞յն պատճառով, որ արհեստականորեն իրավիճակ ստեղծի, որի դեպքում Էրիկ Ալեքսանյանը կկարողանար նիստին հասնել, որ հետո նրան մեղադրի: Դատարանը որտեղի՞ց գիտեր, որ Վերաքննիչ դատարանում նիստը չի կայանալու: Թե՞ դրան ինքն էլ է մասնակցել»,- հարցեր հնչեցրեց Միհրան Պողոսյանը: Նա միաժամանակ արձանագրեց, որ դատարանն ինքն է մեղավոր ստեղծված իրավիճակում: Եթե դատարանը ականջալուր լիներ փաստաբանի խնդրանքին, իրավիճակը այլ կլիներ: «Ալեքսանյանը ժամը 13-ին դատարանում չի եղել հարգելի պատճառով»,- ամփոփեց Պողոսյանը:

Փաստաբան Կարեն Մեժլումյանն անհրաժեշտ համարեց պարզաբանել դատախազի կողմից հնչեցված անհիմն մեղադրանքի հարցը: «Դա անընդունելի է: Կարծում եմ, որ դատարանն ինքը պետք է դիտողություն աներ դատախազին, որպեսզի նման գնահատականները չտարածվեն ամբողջ պաշտպանական կողմի վրա: Կամ դատարանը պետք է բարձրացնի այս հարցը, կամ դատախազը պետք է ապացուցի ասվածը»,- պահանջեց փաստաբանը: Դատավորը հատուկ կրիմինալ չտեսավ դրանում եւ ասաց, որ կողմերն ազատ են արտահայտել իրենց կարծիքը, սակայն փաստաբան Էրիկ Ալեքսանյանի պահվածքի քննարկումներ չեն լինի նրա բացակայությամբ:

Փաստաբան Հայկ Ալումյանը ենթադրեց, որ դատախազի հայտարարությունը թելադրված է տեսախցիկների առջեի իրենց ցույց տալու ցանկությամբ, քանի որ այն ներկաներին դա ոչինչ չի ասում: Դիմելով դատավորին` փաստաբանը նկատեց. «Դուք մեզ հրավիրել եք 13 ժամով, առանց որեւէ պատճառաբանության սպասել ենք 30 րոպե: Ամեն րոպե օրինական իրավունք ունեինք լքել դահլիճը: Այնուամենայնիվ, համբերատար սպասել ենք: Դուք պարտավոր էիք սկսել նիստը, ապա` հետաձգել: Դուք կարող էիք անել ամեն ինչ, բացի մի բանից` չսկսել նիստը: Ինչ է տեղի ունեցել Վերաքննիչ դատարանում: Ես կարող եմ մեծ հավանականությամբ ասել, որ այնտեղ նիստը ձխողելու համար քայլեր են ձեռնարկվել: Օրինակ, այդ նպատակով դատախազն ու քննիչն այնտեղ չգնացին: Դուք նույնպես այնտեղ չգնացիք` չնայած կողմ եք հանդիսանում:

Դարձյալ խոսքի իրավունք ստանալով` դատախազ Գեւորգ Բաղդասարյանը ցավով հայտարարեց, որ «ստացվում է, որ դատարանն է մեղավոր», եւ խորհուրդ տվեց ավելի ուշադիր լինել «տեսախցիկների առջեւ»: Դատախազ Պետրոս Պետրոսյանն ափսոսանք հայտնեց, որ պաշտպանական կողմից ոչ ոք մտահոգություն չհայտնեց, թե ինչու նիստը չկայացավ: Ի պատասխան, փաստաբանները հիշեցրին ակնհայտի մասին. պատճառների քննարկումը չի կարող տեղի ունենալ փաստաբան Ալեքսանյանի բացակայության պայմաններում:

Դատավոր Դանիբեկյանը տեղեկացրեց, որ փաստաբանը դիմել էր դատարան Արմեն Գեւորգյանի` երկրից դուրս գալու կապակցությամբ: Ի սկզբանե ուղեւորությունը նախատեսվում էր փետրվարի 17-ին, եւ փաստաբանը հրատապ նիստ էր խնդրել միջնորդության քննության համար: Դատարանը մերժել էր: Փաստաբանը երկրորդ անգամ էր դիմել, որպեսզի Գեւորգյանը կարողանա մեկնել փետրվարի 24-ին, եւ կրկին դատարանը մերժել էր: Փաստաբանը բողոքարկել էր դատարանի անգործությունը: «Իսկ այժմ նա բացակայում է: Դատարանը կասկածներ ունի, որ միջնորդությունների նպատակն այն չէ, ինչի մասին հայտարարվել է»,- ասաց դատավոր Դանիբեկյանը` խոստանալով քննել նաեւ այս հարցը:

Արմեն Գեւորգյանը խոսքի իրավունք խնդրեց եւ հետաքրքրվեց, թե ինչու դատարանը չի ներկայացնում ամբողջ ճշմարտությունը: «Փետրվարի 16-ին դատարանը չլսեց միջնորդությունը, ուստի եւ խնդրեցին արտահերթ նիստ նշանակել: Նույն օրն Էրիկ Ալեքսանյանը տեղեկացրեց Ձեզ, որ ինքը չի կարող մասնակցել փետրվարի 23-ի նիստին: Մենք երկու անգամ դիմել ենք Ձեզ` նիստ անցկացնելու խնդրանքով»,- հիշեցրեց Գեւորգյանը:

Հաջորդ նիստը տեղի կունենա մարտի 2-ին` ժամը 13:00-ին: