Պուտինը լկտիություն է անվանել ԱՄՆ սենատի ընդունած հակառուսական օրինագիծը

Ռուսաստանի Դաշնության նախագահ Վլադիմիր Պուտինը, մեկնաբանելով Միացյալ Նահանգների Սենատի կողմից ընդունված նոր հակառուսական օրինագիծը, ասել է, որ դա լկտիություն է:

Ինչպես նշում է The Guardian-ը, ՌԴ ղեկավարը նշել է, որ Մոսկվայի դեմ նոր պատժամիջոցների սահմանումը միջազգային իրավունքի խախտում է: Պուտինը սպառնացել է, որ փաստաթղթի՝ նախագահ Դոնալդ Թրամփի կողմից ստորագրվելու ու օրենք դառնալու դեպքում, Ռուսաստանը կդիմի համարժեք քայլի:

«Առայժմ մենք շատ զուսպ ու համբերատար ենք, բայց կգա մի պահ, երբ պատասխան տալու անհրաժեշտություն կլինի: Հնարավոր չէ անվերջ հանդուրժել մեր երկրի նկատմամբ իրականացվող լկտիությունը: Նման մոտեցումն անընդունելի է՝ դա միջազգային հարաբերությունների և միջազգային իրավունքի խախտում է»,-ասել է Պուտինն իր ֆինն գործընկեր Սաուլի Նիինիստոյի հետ մամուլի ասուլիսի ժամանակ:

Այնուհանդերձ՝ ՌԴ ղեկավարը չի մանրամասնել, թե ինչպես է Ռուսաստանը պատասխանելու ԱՄՆ-ին:

Աղբյուրը, հիմնվելով քաջատեղյակ աղբյուրների վրա, չի բացառում, որ Մոսկվան կարող է երկրից արտաքսել ամերիկացի դիվանագետներին, առգրավել նրանց դիվանագիտական գույքը, խստացնել Ռուսաստանում գործող ամերիկյան ընկերություններին ներկայացվող պահանջները, դադարեցնել հարստացված ուրանի արտահանումն ԱՄՆ:

Միացյալ Նահանգների Սենատը, հավանություն տալով Ռուսաստանի նկատմամբ նոր պատժամիջոցներին, նախագահ Դոնալդ Թրամփին դրել է անհարմար դրության մեջ ու փաստացի ստիպել նրան կամ ավելի կոշտ դիրքորոշում ունենալ Մոսկվայի նկատմամբ, կամ էլ վետոյի իրավունք կիրառել օրինագծի դեմ՝ բարկացնելով հանրապետական կուսակիցներին:

Սենատի կողմից ընդունված օրինագիծն ի չիք դարձրեց Թրամփի բոլոր հույսերն առ այն, որ Ռուսաստանի հետ հարաբերությունները կարելի է կարգավորել:

Օրինագիծը, որի դրույթներից մեկի համաձայն՝ Թրամփը հնարավորություն չի ունենա մեղմել նախկինում Ռուսաստանի նկատմամբ սահմանված պատժամիջոցները, այժմ ուղարկվելու է Սպիտակ տուն, որպեսզի Թրամփը կա՛մ ստորագրի, կա՛մ վետո կիրառի դրա դեմ: