Սաակաշվիլին խոստացել է պայքարել Ուկրաինա վերադառնալու իրավունքի համար (տեսանյութ)

Օդեսայի նախկին նահանգապետ Միխեիլ Սաակաշվիլին հայտարարել է, որ պայքարելու է Ուկրաինա վերադառնալու իրավունքի համար՝ չնայած, որ իշխանություններն իրեն զրկել են քաղաքացիությունից: Այս մասին համապատասխան տեսաուղերձը քաղաքական գործիչը հայտնել է իր ֆեյսբուքյան էջում:

«Ես սովորական ուկրաինացի եմ: Հիմա իշխանություններն ինձ հետ վարվում են ճիշտ այնպես, ինչպես շարքային քաղաքացիների հետ՝ անտեսելով նրանց իրավունքները: Ես Ուկրաինայում եմ ապրել ավելի քան 13 տարի, մասնակցել եմ 3 հեղափոխության: Ես ունեմ միայն մի քաղաքացիություն՝ ուկրաինական, և ես դրանից չեմ զրկվի: Ես մեկ այլ վայրում չեմ մնա ու չեմ փոխի կարգավիճակս, ես պայքարելու եմ Ուկրաինա վերադառնալու օրինական իրավունքիս համար»,- հայտարարել է Սաակաշվիլին:

Նա նաև հավելել է, որ երկրի նախագահ Պյոտր Պորոշենկոն «թքած ունի Սահմանադրության վրա, որի երաշխավորը պետք է լինի»:

Մինչդեռ Սաակաշվիլիի «Նոր ուժերի շարժում» կուսակցությունն այս առնչությամբ հայտնել է, որ դա սահմանադրական, ինչպես նաև՝ Քաղաքացիության մասին եվրոպական կոնվենցիայի խախտում է:

Ավելի վաղ Սաակաշվիլին հայտարարել էր, որ քաղաքացիությունից զրկվելուց հետո «կապրի Կիևում ու կքայլի Մայդանով»:

Աղբյուրը հիշեցնում է, որ հուլիսի 26-ին նախագահ Պորոշենկոն Սաակաշվիլիին քաղաքացիությունից զրկելու մասին հրամանագիր է ստորագրել: Հայտնի է, որ Վրաստանի նախկին նախագահն անկետա լրացնելու ժամանակ կեղծ տվյալներ է նշել: Նա, մասնավորապես, նշել է, որ քննության տակ չի գտնվում ո՛չ Ուկրաինայում, ո՛չ որևէ այլ պետությունում: Սակայն իրականում Սաակաշվիլին հեռակա կարգով կալանավորված է Վրաստանում:

tert.am