Ռուսաստանաբնակ հայ ռեժիսորին սպառնում է ազատազրկում՝ ԱՄԷ-ում անօդաչու սարք օգտագործելու համար

Ռուսաստանաբնակ հայ ռեժիսոր Արիկ Մանուկյանը և նրա եղբայրն ավելի քան 2 ամիս չեն կարողանում լքել Արաբական Միացյալ Էմիրությունների տարածքը. հարսանեկան ֆիլմի նկարահանումների համար ԱՄԷ մեկնած տղամարդկանց սպառնում է ազատազրկում՝ անօդաչու թռչող սարք օգտագործելու համար: Այս մասին հայտնում է moscowexpress.info-ն:

«Մայիսի 26-ին Մոսկվայից նորապսակների հետ երեք օրով եկանք Դուբայ: Առավոտյան գնացինք ծովի մոտ, մի քանի կադր արեցինք, այնուհետ մեկնեցինք Աբու Դաբի՝ շեյխ Զաիդի մզկիթի ֆոնին նկարահանումներ անելու համար՝ չկասկածելով՝ ինչ է մեզ սպասվում դրա պատերի մոտ», - ասել է Արիկ Մանուկյանը:

Ռեժիսորի խոսքով՝ իրենք որոշել են մզկիթի ավտոկայանատեղից դրոնի միջոցով նկարահանել ճարտարապետական համալիրի ընդհանուր տեսքը:

«Մզկիթի պահակները նկատեցին թռչող սարքը, մոտեցան մեզ և, առգրավելով այն, մտան մզկիթ: Մի քանի ժամ սպասեցինք այնտեղ՝ կարծելով, թե մեզ կարող են տուգանել և բաց թողնել, սակայն ինձ, եղբորս և փեսայի եղբորը տարան քրեական հետախուզության բաժանմունք», - վերհիշել է ռեժիսորը:

Մանուկյանը պատմել է, որ այնտեղ իրենք մնացել են 6 օր՝ հնարավորություն չունենալով զանգահարել հարազատներին և ընկերներին, որոնք մտածել են, թե նրանց հետ դժբախտ դեպք է տեղի ունեցել:

«Հունիսի մեկին մեզ ձեռնաշղթաներ հագցրին, և մեկ ժամ անց հայտնվեցինք դատական բանտում։ Երեք օր անցկացրինք կարանտինային գոտում: Խցիկը նախատեսված էր երեք հոգու համար, սակայն 12 մարդ ենք եղել այնտեղ: Կարանտինային գոտու պայմանները շատ վատն էին», - մանրամասնել է տղամարդը:

Կարանտինային գոտում երեք օր մնալուց հետո նրանք տեղափոխվել են բանտ, որտեղ 3 օր անցկացնելուց հետո նրանց անսպասելի ազատ են արձակվել:

«Միջադեպից անցել է համարյա 2 ամիս, և մինչ օրս անհայտ է՝ երբ կփակվի մեր գործը, որը ոչ մի հիմք չունի և նույնիսկ ծիծաղ է առաջացնում, որ ժամանակակից աշխարհում դրոնով նկարահանում անելու պատճառով ռուսաստանցի զբոսաշրջիկները կարող են ճաղերի հետևում հայտնվել: Այժմ մեր գործը գտնվում է ԱՄԷ-ի ՆԳ նախարարությունում», - ասել է նա:

ԱՄԷ-ում ՌԴ դեսպանատան հյուպատոսական բաժնի ղեկավար Ռամիլ Բիկմուլինը հավաստիացրել է, որ Ռուսաստանի իշխանություններն անում են հնարավոր ամեն բան իրավիճակը կարգավորելու համար՝ միևնույն ժամանակ չբացառելով, որ Ռուսաստանի քաղաքացիներին կարող է ազատազրկում սպառնալ:

tert.am