ԱՄՆ պետքարտուղարը կարող է լքել պաշտոնը Թրամփի հետ տարաձայնությունների պատճառով

Միացյալ Նահանգների պետքարտուղար Ռեքս Թիլերսոնը, որը նախկինում Exxon-Mobil նավթային ընկերության գլխավոր գործադիր տնօրենն էր, կարող է մոտ ժամանակներս լքել պաշտոնը: Այս մասին հայտնում է CNN-ը՝ ընդգծելով, որ Թիլերսոնը մի շարք հարցերի շուրջ լուրջ տարաձայնություններ ունի երկրի նախագահ Դոնալդ Թրամփի հետ:

Աղբյուրը մանրամասնում է, որ տարաձայնությունները վերաբերում են Իրանի նկատմամբ վարած քաղաքականությանը, ինչպես նաև անձնական բնույթ են կրում:

Բացի այդ, վերջերս պետքարտուղարը ոչ պրոֆեսիոնալ է որակել Թրամփի՝ գլխավոր դատախազ Ջեֆ Սեշնսի վերաբերյալ արված վերջին հայտարարությունը, որում նախագահն ափսոսանք էր հայտնել նրան այդ պաշտոնում նշանակալու համար:

Թիլերսոնին մոտ աղբյուրների փոխանցմամբ՝ թեև Թրամփի ու Թիլերսոնի միջև առկա են հակասություններ, այնուհանդերձ՝ պետքարտուղարը պատրաստվում է առնվազն մինչև տարեվերջ մնալ պաշտոնում: Սակայն Պետքարտուղարությունում եղած աղբյուրների համոզմամբ՝ Թիլերսոնի հրաժարականը սարերի հետևում չէ:

tert.am