Առնվազն 67 մարդ է ձերբակալվել Անկարայում բողոքի ակցիայի ժամանակ (տեսանյութ)

Առնվազն 67 մարդ է ձերբակալվել կիրակի՝ հուլիսի 23-ին, Թուրքիայի մայրաքաղաք Անկարայում բողոքի ակցիայի ժամանակ, գրում է lenta.ru-ն:

Հաղորդվում է, որ ցուցարարները դուրս են եկել Քըզըլայ հրապարակ՝ հաջակցություն այժմ կալանքի տակ պահվող երկու դասախոսի: Նրանք կասկածվում են Թուրքիայում արգելված «Հեղափոխական ազգային-ազատագրական կուսակցություն-ճակատ» կազմակերպության հետ կապերի համար:

Ձերբակալված ակտիվիստներից ավելի քան 20-ը կին է:

Դասախոսները հեռացվել էին աշխատանքից երկու ամիս առաջ ուսումնական հաստատություններում 2016 թվականի հուլիսի 15-ի հեղաշրջման փորձից հետո իշխանությունների նախաձեռնած զտումների հետևանքով:

Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Զոհվել է Թուրքիայի ավելի քան 225 քաղաքացի, ավելի քան երկու հազար մարդ ստացել է վնասվածքներ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում: