Սա ուներ մեկ նպատակ՝ վախեցնել, որ պակասեցնեմ իմ քաղաքական ակտիվությունը, բայց կլինի հակառակը. Բաբկեն Հարությունյան

Այդ հանցագործությունը իմ հանդեպ իրականացվել է քաղաքական հետապնդման շրջանակներում. նման ապօրինի գործողություններով փորձ է արվում խոչընդոտելու լռեցնելու, վախեցնելու ինձ, որը չի հաջողվելու այս ազգադավ իշխանություններին: Այս մասին NEWS.am-ի հետ զրույցում ասաց «Հայրենիք» կուսակցության անդամ Բաբկեն Հարությունյանը՝ անդրադառնալով իր մեքենայի վնասելուն, ինչի մասին իր ֆեյսբուքյան էջում հայտնել է նա եւ հրապարակել լուսանկարներ:

«Սրան նախորդել են մի շարք այլ գործողություններ, այդ թվում ինձ ապօրինի կերպով ոստիկանություն բերման ենթարկելը, նաեւ քրգործ է հարուցված իմ նկատմամբ անօրինկան հավաքներ, երթեր կազմակերպելու մեղադրանքով: Ինձ ձերբակալել էին եւ միայն դատարանի որոշմամբ ազատ արձակեցին;

Մինչ այդ բանալի էին կոտրել դռանս մեջ, որ չկարողանամ մտնել իմ բնակարան: Ձերբակալության ժմանակ վերցրել էին գումար, բանալիներ եւ օրեր առաջ միայն հետ վերադարձեցին:

Այսինքն տեսնում ենք շարունակական հետապնդման գործողություններ, չբացահայտված դեպքեր, որոնք միտված են մեկ նպատակի, որ իմ քաղաքական ակտիվությունը պակասեցնեմ, բայց լինելու է ճիշտ հակառակը»,-հայտարարեց Հարությունյանը՝ հիշեցնելով, որ 2 օր առաջ էլ միջադեպ էր եղել ԱԺ-ի դիմաց իր եւ «Իմ քայլի» պատգամավոր Հայկ Սարգյանի միջեւ:

«Հայրենիքի» անդամը տեղեկացրեց, որ արդեն դիմել է ոստիկանություն: