Հայաստանի նոր իշխանություններն իրենց տարօրինակ են պահում ղարաբաղցիների նկատմամբ. Վլադիմիր Սոլովյով

Հայտնի ռուս հեռուստառադիոհաղորդավար Վլադիմիր Սոլովյովը «Վեստի FM» ռադիոկայանի Полный контакт ծրագրի եթերում զրուցել է Մերձավոր Արևելքի և Կենտրոնական Ասիայի երկրների ուսումնասիրման կենտրոնի տնօրեն Սեմյոն Բաղդասարովի հետ՝ քննարկելով նաև Հայաստանին առնչվող թեմաներ:

Հաղորդավարն ընդգծել է, որ իրեն մտահոգում է այն հանգամանքը, որ Հայաստանի նոր իշխանություններն իրենց խիստ տարօրինակ են պահում ղարաբաղցիների նկատմամբ:

«Ես մի մտերիմ ընկեր ունեմ՝ Սեյրանը, ով միլիարդավոր ներդրումների բիզնես է բերել Հայաստան: Բոլորին նախագիծը դուր է եկել, իսկ Սեյրանն այնպիսի հայրենասեր է, բայց ծնունդով Ղարաբաղից է: Միևնույն ժամանակ նա երկար տարիներ եղել է Ռուսաստանում, այնուհետև Դուբայում: Նա մեծ քանակությամբ գումար է ներդրել Ղարաբաղում և Հայաստանում, այսինքն՝ նա շատ է սիրում իր հայրենիքը: Այժմ նրան ուղղակի հնարավորություն չեն տալիս իրականացնել նախագիծը միայն այն պատճառով, որ նա ծնունդով Ղարաբաղից է»,- ասել է Սոլովյովը՝ նշելով, որ մարդկանց ծննդավայրով բնորոշելը քաղաքակիրթ չէ:

Հաղորդավարն ընդգծել է, որ չի կարող հավատալ նրան, որ նոր վարչապետը կարող է գիտակցաբար նման կերպ վարվել, քանի որ դա հակասում է բոլոր սկզբունքներին, որոնց մասին նա նախկինում հայտարարել էր:

Բաղդասարովն, իր հերթին, ընդգծել է, որ Հայաստանում ներկա պահին հակաղարաբաղյան տրամադրություններ են տիրում: