Բուշ ավագն ավելի քան 10 տարի գաղտնի հովանավորել է ֆիլիպինցի մի երեխայի

ԱՄՆ 41-րդ նախագահ Ջորջ Բուշը, որը վերջերս է մահացել, ավելի քան 10 տարի անանուն հովանավորել է ֆիլիպինցի մի երեխայի: Այս մասին հաղորդում է CNN-ը:

Այս տեղեկությունը բացահայտել է քրիստոնեական բարեգործական՝ Compassion International կազմակերպությունը, որը ողջ աշխարհում օգնություն է ցուցաբերում աղքատ երեխաներին:

Բարեգործական ընկերությունը լրագրողներին որոշ նամակներ է տրամադրել, որտեղ Բուշ ավագը գրում է 7-ամյա Թիմոթիին: Ավելի քան 10 տարի ԱՄՆ-ի նախկին նախագահը տղային միջոցներ է ուղարկել՝ կրթության, արտադպրոցական ուսումնառության և նույնիսկ սննդի համար:

Նշվում է, որ Բուշի ընտանիքը չի կարողացել մեկնաբանություններ տալ այս առնչությամբ: Բայց Բուշ ավագի գրասենյակի ներկայացուցիչ Ջիմ Մաքգրաթը հաստատել է նամակների իսկությունը:

Երեխային աջակցելու գաղափարը Բուշի մտքում ծագել է 2001 թվականին, երբ նա Վաշինգտոնում այցելել է Սուրբ Ծննդին նվիրված համերգի: Թիմոթիին ուղղված առաջին նամակը Բուշն ուղարկել է 2002 թվականի հունվարի 24-ին:

Տղան, ըստ պնդումների, մինչև 17 տարեկան դառնալը չի իմացել, թե ով է իր հովանավորը: Այսինքն՝ մինչև այն պահը, երբ «դուրս է եկել» բարեգործական ծրագրից: