«Ռեալը» պարտվում է եւ զարմացնում, իսկ «Բարսելոնան» փրկվում պարտությունից

Իսպանիայի առաջնության 13-րդ տուրի կենտրոնական խաղում Մադրիդի «Ատլետիկոն» տանը մրցեց չեմպիոն «Բարսելոնայի» հետ եւ մինչեւ վերջին րոպեն հաղթում էր նվազագույն հաշվով, սակայն բաց թողեց հաղթանակը՝ 1:1:

77-րդ րոպեին ֆրանսիացի հարձակվող Անտուան Գրիզմանի փոխանցումն անկյունայինից արդյունավետ օգտագործեց իսպանացի հարձակվող Դիեգո Կոստան՝ առաջ մղելով մադրիդցիներին:

Սակայն 90-րդ րոպեին կատալոնական թիմին պարտությունից փրկեց ֆրանսիացի կիսապաշտպան Ուսման Դեմբելեն: Գոլային փոխանցումը կատարեց արգենտինացի Լիոնել Մեսին:

«Բարսելոնան» 25 միավորով մնաց առաջին տեղում: «Ատլետիկոն» հետ է 1 միավոր: Երկու թիմերին էլ այս տուրում շրջանցելու հնարավորություն ստացավ «Սեւիլիան», որը 12 խաղից հետո 23 միավորով երրորդ տեղում է եւ նոյեմբերի 25-ին կընդունի «Վալյադոլիդին»:

Ինչ վերաբերում է «Ռեալին», ապա այս թիմը չի դադարում զարմացնել եւ հաջողացրեց 3:0 հաշվով պարտվել «Էյբարին» եւ հիմա փորձում է թիմ հրավիրել Ազարին եւ Կավանիին, կարծես անհաջող խաղի պատճառը խաղացողների մեջ է:

Իրականությունն այն է, որ թիմից հեռացել է միայն Ռոնալդուն, իսկ մյուսները տեղում են: Խնդիրն այլ տեղ է, որի մասին չեն բարձրաձայնում: