«Ил-20-ի կործանման մեղքը լիովին իսրայելական կողմի վրա է». Շոյգու

Սիրիայի հակաօդային պաշտպանության ուժերի կողմից Միջերկրական ծովի արևելյան մասում ռուսական ռազմական հսկողության օդանավի խոցումը կանխամտածված չի եղել: Մոսկվան հայտարարել է, որ մեղավոր է համարում Իսրայելի անխոհեմ գործողությունները, որոնք հանգեցրել են 15 ռուս զինծառայողների մահվան:

Ռուսաստանի պաշտպանության նախարար Սերգեյ Շոյգուն իր իսրայելցի գործընկերոջ հետ հեռախոսազրույցում հայտարարել է, որ «ռուսական ինքնաթիռի կործանման և ինքնաթիռի անձնակազմի մահվան մեղքը լիովին իսրայելական կողմի վրա է»:

Ռուսաստանի նախագահ Վլադիմիր Պուտինը, սակայն, Իսրայելի վարչապետի հետ հեռախոսազրույցում, թեև ասել է, որ իսրայելական կողմը մեղքի իր բաժինն ունի, սակայն ավելի վաղ Միջերկրական ծովի վրա Ил-20-ի կործանումը անվանել է «ողբերգական հանգամանքների շղթա»։

Ռուսաստանյան ռազմական հսկողության Ил-20 օդանավը, որում գտնվում էր 15 մարդ, խոցվել է Միջերկրական ծովի արևելքում՝ Սիրիայի ափերի մոտ: Ռուսաստանի պաշտպանության նախարարության պաշտոնական ներկայացուցիչ Իգոր Կոնաշենկովը հաստատել է, որ օդանավը խոցվել է Սիրիայի հակաօդային պաշտպանության կողմից, սակայն, նրա խոսքով, Ил-20-ը «հարվածի տակ են դրել» Իսրայելի օդանավերը: