Ռուսաստանին ունեցած 3 մլրդ դոլար պարտքի վերաբերյալ դատական գործով հօգուտ Ուկրաինայի վճիռ է կայացվել

Լոնդոնի վերաքննիչ դատարանը Ռուսաստանին ունեցած 3 մլրդ դոլար պարտքի վերաբերյալ դատական գործով հօգուտ Ուկրաինայի վճիռ է կայացրել, գրում է ria.ru-ն՝ մանրամասնելով, որ այժմ ռուսական կողմը մտադիր է դիմել Անգլիայի գերագույն դատարան:

ՌԴ ֆինանսների նախարար Անտոն Սիլուանովը հույս է հայտնել է, որ հաջորդ, ավելի բարձր դատական մարմինը՝ Գերագույն դատարանը, օբյեկտիվ վճիռ կկայացնի Մոսկվայի ու Կիևի միջև վեճի հարցով:

Հայտնի է, որ 2013թ. Մոսկվան ոչ շուկայական պայմաններով երեք միլիարդ դոլարի ուկրաինական եվրոբոնդեր է գնել: Ուկրաինան մինչ 2015թ. ավարտը պարտաճանաչ սպասարկել է պարտքը, սակայն դրանից հետո տվյալ պարտատոմսերի նկատմամբ դեֆոլտ է հայտարարել:

Արդյունքում Ռուսաստանի ֆինանսների նախարարությունը հայց է ներկայացրել Լոնդոնի բարձր դատարան, որը 2017թ. մարտին հօգուտ Ռուսաստանի վճիռ է կայացրել՝ Ուկրաինային պարտավորեցնելով Մոսկվային վճարել պարտատոմսերի անվանական արժեքը՝ 3 մլրդ դոլար: 

Ավելի ուշ Ուկրաինան որոշումը բողոքարկել է վերաքննիչ դատարանում, որն էլ հօգուտ Կիևի որոշում է կայացրել: Այժմ սպասվում է վեճի վերաբերյալ նոր լսում։