Փարիզում Սաուդյան Արաբիայի արքայադստեր հյուրանոցային համարից 800.000 եվրոյի զարդ են գողացել

Սաուդյան Արաբիայի թագավորական ընտանիքի անդամներից մեկը դիմել է ոստիկանություն՝ տեղեկացնելով, որ Փարիզի Ritz հյուրանոցի իր համարից 800.000 եվրո արժողությամբ զարդեր են գողացել:

Ինչպես նշում է The Local-ը, թեև կնոջ անունը չի հրապարակվել, սակայն հայտնի է, որ նա արքայադստեր տիտղոս ունի:

Աղբյուրը մանրամասնում է, որ զարդերը չհրկիզվող պահարանում չեն եղել: Քաջատեղյակ աղբյուրի փոխանցմամբ՝ ոստիկանները խուզարկել են համարն ու պարզել, որ գողը կամ գողերը ներթափանցել են առանց ավելորդ ջանք գործադրելու, որևէ բան չեն կոտրել կամ վնասել:

Այժմ դեպքի առնչությամբ հետաքննություն է սկսվել:

Հիշեցնենք, որ 2016թ. հոկտեմբերին փարիզյան հյուրանոցներից մեկում կողոպուտի էր ենթարկվել ամերիկահայ հեռուստաաստղ Քիմ Քարդաշյանը: Դիմակավորված 5 հանցագործները ներխուժել էին համար, կապկպել Քարդաշյանին ու նրան այդպես թողել լոգասենյակում՝ համարից գողանալով միլիոնավոր դոլարներ արժողությամբ զարդեր:

Tweet