Բրիտանացին բեմադրել է իր առևանգումը և փրկագին պահանջել իր հղի ընկերուհուց

Մեծ Բրիտանիայի Լանքաշիր կոմսության Բլեքփուլ քաղաքի բնակիչը բեմադրել է իր առևանգումն ու դատապարտվել 16 շաբաթ ժամկետով ազատազրկման: Այդ մասին հայտնում է The Sun-ը:

Աղբյուրի հաղորդմամբ՝ միջադեպը տեղի է ունեցել հունվարին: 45-ամյա Լի Ֆորդը զանգահարել է իր հղի ընկերուհուն ու ասել, որ իրեն առևանգել են:

«Սկզբից մտածեցի, թե կատակում է, սակայն նրա ձայնն իսկապես վախեցած էր: Հեռախոսն անջատվեց, այնուհետև կրկին զանգահարեց: Տղամարդկանց ձայներ լսվեցին. նրանք գոռում էին, սպառնում կոտրել նրա ոտքերն ու եռման ջուր լցնել նրա վրա»,- պատմել է Զոե Դոյլը:

Արդյունքում աղջիկը հավատացել ու համաձայնել է փրկագին վճարել: Նրան հաջողվել է մոտ 80 ֆունտ ստեռլինգ գտնել, որոնք նա փոխանցել է նշված բանկային հաշվին, այնուհետև ոստիկանությանը տեղեկացրել է տեղի ունեցածի մասին:

Նշվում է, որ կորած տղամարդուն փնտրել են գրեթե մի օր: Ոստիկանությունն ուղղաթիռ ու համապատասխան մասնագետ է ուղարկել: Տեսախցիկների տեսանյութերն ուսումնասիրելու արդյունքում իրավապահները կադրեր են գտել, որոնցում «առևանգված» տղամարդը և նրա ընկերները շշերով դուրս են եկել խանութից:

Հաջորդ առավոտ Լին վերադարձել է տուն, և նրան ձերբակալել ու մեղադրել են ոստիկանության ժամանակն ու միջոցները վատնելու համար. փրկարարական գործողության համար 30 հազար ֆունտ ստեռլինգ էր պահանջվել: Տղամարդը շարունակել է ստել, մինչև նրան ցույց են տվել համապատասխան տեսանյութը:

Պարզվել է, որ առևանգումը հորինվել էր՝ ալկոհոլային խմիչքների համար գումար հայթայթելու համար: Փաստաբանի վարկածի համաձայն՝ խանութում Լին հանդիպել է իր հին ծանոթին, որը գտնվել է ծանր ֆինանսական վիճակում, և որոշել է օգնել նրան:

Լին պատմել է Դոյլին, որ այս գաղափարն իրեն տվել են ընկերները, իսկ ինքը համաձայնել էր, քանի որ հարբած էր. ոչ ոք չէր մտածում, որ այս ամենին կմիջամտի ոստիկանությունը:

Նշվում է, որ Դոյլը ներել է իր սիրելիին՝ պնդելով, որ նա արժանի է երկրորդ շանսի:

«Բացատրեցի նրան, որ նա հիմարություն է արել: Սակայն սա եզակի դեպք էր, իսկ մեր հարաբերություններն ընդհանուր առմամբ շատ ամուր են: Գիտեմ, որ Լին սիրում է ինձ և ամեն ինչ անում է, որ լավ լինեմ», - ասել է աղջիկը: