Ռուսաստանի դեմ պատժամիջոցների ուժեղացումը նշանակում է առևտրային պատերազմի հայտարարում

Ռուսաստանի դեմ պատժամիջոցների հետագա ուժեղացումը կգնահատվի որպես տնտեսական պատերազմի հայտարարում: Այդ մասին «Կրոնոցկի» արգելոցի աշխատակիցների հետ հանդիպմանն ասել է ՌԴ վարչապետ Դմիտրի Մեդվեդևը, գրում է «ՌԻԱ Նովոստի»-ն։

«Ես չէի ցանկանա մեկնաբանել հետագա պատժամիջոցների մասին խոսակցությունները, բայց մի բան կարող եմ ասել. եթե հետևի բանկերի գործունեության արգելքի կամ այս կամ այն արժույթի օգտագործման արգելքի նման մի բան, դա կարելի է անվանել տնտեսական պատերազմի հայտարարում: Եվ այդ պատերազմին անհրաժեշտ կլինի արձագանքել տնտեսական մեթոդներով, քաղաքական մեթոդներով, իսկ անհրաժեշտության դեպքում՝ նաև այլ մեթոդներով: Եվ մեր ամերիկացի ընկերները պետք է դա հասկանան»,- հայտարարել է նա՝ պատասխանելով հնչած հարցերին:

Խոսելով արդեն գործող և վերջերս հայտարարված պատժամիջոցների մասին՝ Մեդվեդևն ընդգծել է. «Որքան էլ արևմտյան գործընկերները մտածեն, որ ռուսները վատն են, որ սխալ քաղաքականություն են վարում, որ ՌԴ կառավարությունը պետք է փոխի իր դիրքորոշումը մի շարք հարցերի վերաբերյալ՝ դա զգալի չափով մեր տնտեսական ուժի սահմանափակում է»:

 Նա նշել է, որ պատժամիջոցներն այսպես թե այնպես ազդում են երկրի տնտեսության վրա:

«Դրա մեջ ոչ մի լավ բան չկա, որովհետև ամեն տեսակի սահմանափակում ի վերջո անդրադառնում է տնտեսության, արժույթների փոխարժեքի տատանման վրա»,- հավելել է նա:

ԱՄՆ վարչակազմը չորեքշաբթի հայտարարել է Ռուսաստանի դեմ նոր պատժամիջոցների մասին՝ բրիտանական Սոլսբերի քաղաքում քիմիական զենք կիրառելու համար: NBC հեռուստաալիքի աղբյուրների տվյալներով՝ պատժամիջոցների առաջին փաթեթը ենթադրում է ՌԴ էլեկտրոնային սարքերի և երկակի օգտագործման համար նախատեսված պարագաների արտահանման արգելք, երկրորդ փաթեթը կարող է ներառել դիվանագիտական հարաբերությունների մակարդակի նվազեցում, ԱՄՆ «Աերոֆլոտ»-ի թռիչքների արգելք և ամերիկյան արտահանման գրեթե ամբողջական դադարեցում: Ռուսաստանը կարող է խուսափել պատժամիջոցների երկրորդ ալիքից, եթե երաշխավորի ապագայում քիմիական զենքի չկիրառումը:

Բացի այդ, անցած շաբաթ ամերիկյան Կոնգրեսում Ռուսաստանի դեմ նոր պատժամիջոցների վերաբերյալ օրինագիծ է ներկայացվել, որով ենթադրվում են պատժամիջոցներ ՌԴ բանկային հատվածի դեմ:

Այս թեմայով ԱՄՆ վիզաների համակարգը պաշտպանված է խիստ ստուգումների շնորհիվ․ դեսպանություն Հեգսեթ. ԱՄՆ-ն պետք է օգտագործի իր սեփական զինամթերքը, այլ ոչ թե ուղարկի այն Ուկրաինա Մերձավոր Արևելքում ԱՄՆ մի շարք դեսպանատներ ժամանակավորապես փակվել են ԱՄՆ-ը Էկվադորի հետ համատեղ գործողություն է սկսել ահաբեկչական կազմակերպությունների դեմ The Wall Street Journal. Պենտագոնը տասնամյակներ շարունակ խրախուսել է ամերիկացիների հավատը ՉԹՕ-ների նկատմամբ