Ղրղզստանի նախագահը Նիկոլ Փաշինյանի փորձից ոգեշնչված՝ հակակոռուպցիոն արշավ է սկսել

Ղրղզստանի իշխանություններն առաջարկել են երկրի քաղաքացիներին գումար հավաքել և ընդհանուր ջանքերով մարել արտաքին պարտքը, որը կազմում է 4,4 միլիարդ դոլար: Նախաձեռնությամբ է հանդես եկել երկրի վարչապետ Մուհամեդքալի Աբըլգազիևը: Երկրի կառավարությունը հայտնել է երկու հաշվեհամար բացելու մասին, մեկը՝ կոռուպցիոն գործերով բռնագրավված միջոցների, մյուսը՝ պետությանն օգնել ցանկացողների համար: Ղրղզստանի իշխանությունները փաստացիորեն հայտնել են դեֆոլտի մասին, գրում է Независимая Газета-ն:

«Ղրղզստանի վարչապետը փաստացիորեն խոստովանել է, որ պետությունը չի կարող կատարել իր պարտավորությունները»,- НГ-ին ասել է «Стратегия Восток–Запад» վերլուծական կենտրոնի գլխավոր տնօրեն Դմիտրի Օրլովը:

Այնուամենայնիվ, չնայած մարդիկ կգտնվեն, որ գումարներ կփոխանցեն իրենց փոքր աշխատավարձերից, սակայն երկրի ոչ բոլոր բնակիչներն են համաձայն նման քայլի, հատկապես՝ բնակչության աղքատացման, զանգվածային գործազրկության և հարկադրված աշխատանքային միգրացիայի պայմաններում:

Մարդկանց մոտ հարց է առաջանում, թե արդյոք կարող են իրենց գումարները վճարել այնպիսի պետության, որը չի կարող վերահսկել բյուջետային միջոցների և ներկայիս պարտքի վճարումների կառավարումը: Պաշտոնյաները շտապել են վստահեցնել բնակչությանը, որ կիրականացվի գումարների անհրաժեշտ վերահսկողություն: Նրանք առաջարկում են ստեղծել դիտորդական խորհուրդ, որում կընդգրկվի 13 մարդ:

Լրատվամիջոցը գրում է, որ Ղրղզստանի նախագահ Սոորոնբայ Ժեենբեկովը, ոգեշնչվելով Հայաստանի վարչապետ Նիկոլ Փաշինյանի փորձից, որն այժմ ակտիվորեն նոր հիմնադրամներ է ձևավորում կոռուպցիոն ճանապարհներով ձեռքբերված միջոցների վերադարձի հաշվին, հայտարարել է հուլիսի 1-ից սկսված արշավի շրջանակում բոլոր պաշտոնյաների ծախսերը ստուգելու անհրաժեշտության մասին:

«Ստուգեք յուրաքանչյուր նախարարություն և գերատեսչություն՝ կոռուպցիոն սխեմաների առնչությամբ, անձամբ յուրաքանչյուր պաշտոնյայի»,- հայտարարել է Ժեենբեկովը խորհրդակցության ժամանակ:

Նա ընդգծել է, որ «կոռուպցիայի դեմ պայքարը պետք է լինի անողորմ, և պետք է հաշվի չառնվեն պաշտոնները և աստիճանները, «քաղաքացիները սպասում են կոնկրետ գործողությունների և կոռուպցիայի արմատախիլ անելուն ուղղված խիստ քայլերի»:

Այնուամենայնիվ, փորձագետները նշում են, որ Ղրղզստանում այդ ուղղությամբ աշխատանքները չափազանց թույլ են, և դեռ հնարավոր չէ ակնկալել, որ կառաջանան զգալի հոսքեր: