Bloomberg-ը կազմել է ամենահարուստ 25 ընտանիքների ցանկը

Bloomberg-ի փորձագետները կազմել են ամենահարուստ 25 ընտանիքների ցանկը, որոնք ընդհանուր առմամբ ավելի քան 1.1 տրլն դոլար ունեցվածք ունեն, հաղորդում է ՌԲԿ-ն:

Ընդ որում վարկանիշում հաշվի են առնվել միայն բավական «հին փողերը», այսինքն կարողությունները, որոնք գոնե մեկ անգամ ժառանգությամբ փոխանցվել են մեկ սերնդից մյուսին եւ չեն մնացել միակ ժառանգորդի ձեռքում: 25 ընտանիքների ցուցակում Ասիայից ընդամենը 3 ընտանիք է ընդգրկվել. տեղական միլիարդատերերից շատերը, հատկապես չինացիները, վերջերս են հարստացել եւ նրանց փողերը պարզապես չեն հասցրել «հնանանալ»:

Ցուցակի առաջատարը Ուոլթոնների ընտանիքն է, որը վերահսկում է 12 հազար Walmart սուպերմարկետների ցանցը: Ընտանիքի անդամների ընդհանուր կարողությունը, որի բարեկեցության հիմքը դրել է Սեմ Ուոլթոնը՝ 1945-ին գնելով իր առաջին խանութը, Bloomberg-ը 151.5 մլրդ դոլար է գնահատել:

Չարլզ եւ Դեւիդ Կոխերի՝ Ֆրեդ Կոխի երկու որդիների կարողությունը, որը 1940-ին հիմնադրել է ընկերություն, որից 40 տարի անց ստեղծվել է ամերիկյան Koch Industries կորպորացիան, Bloomberg-ը 98.7 մլրդ է գնահատել: Ի սկզբանե ընտանեկան գործում 4 եղբայր էր մասնակցում, բայց 1983-ին Ֆրեդերիկը եւ Ուիլյամը դուրս եկան բիզնեսից՝ իրենց մասնաբաժինները վաճառելով Չարլզին եւ Դեւիդին:

3-րդ տեղում (89,7 մլրդ դոլար) Ֆրենկ Մարսի ժառանգներն են: Mars Inc.-ը մինչեւ հիմա ամբողությամբ պատկանում է Մարսերի ընտանիքին:

Աշխարհի ամենահարուստ ընտանիքների հնգյակում Բելգիայի երեք դինաստիաներն են (վան Դամ, դե Մեվիուս եւ դե Շպելբերխ) ներառվել, որոնք վերահսկում են Anheuser-Busch InBev գարեջրային ընկերությունը ($ 54.1 մլրդ) եւ Դյումա ընտանիքը, որին պատկանում է Hermes նորաձեւության տունը (49.2 միլիարդ դոլար):

Ասիայի ներկայացուցիչներից վարկանիշում առաջինը դարձել են Ամբանի ընտանքի անդամները, որոնք ղեկավարում են Reliance Industries (43,4 մլրդ դոլար) խոշոր հնդկական հոլդինգը: Bloomberg-ի գնահատականենրով՝ այս ընտանիքն աշխարհում ըստ մեծության 7-րդ կարողությունն ունի: