Էրդողանին ձայն տված Ավստրիայում բնակվող թուրքերը թող վերադառնան իրենց երկիր․ ավստրիացի քաղաքական գործիչ

Ավստրիայի աջակողմյան «Ազատություն» կուսակցության անդամ Յոհան Գուդենուսը խորհուրդ է տվել երկրում բնակվող և Թուրքիայի նախագահական ընտրությունների ժամանակ գործող նախագահ Ռեջեփ Թայիփ Էրդողանի օգտին քվեարկած թուրքերին վերադառնալ Թուրքիա, գրում է Sputnik-ի թուրքական ծառայությունը։

Ըստ ավստրիացի գործչի՝ Ավստրիայում բնակվող և երկքաղաքացիություն ունեցող թուրքերը, որոնք աջակցում են Էրդողանին, այդպես էլ չեն ինտեգրվել տեղի հասարակությանը, և Էրդողանին ձայն տալը դրա վառ ապացույցն է։

«Ավելի լավ կլինի, որ վերադառնան իրենց երկիր», - ասել է Գուդենուսը։

Հայտնի է, որ Ավստրիայում ընտրության իրավունք ունեցող թուրք քաղաքացիների 72.3 տոկոսը ձայն է տվել Էրդողանին։ Խորհրդարանական ընտրություններում Թուրքիայի իշխող «Արդարություն և զարգացում» կուսակցությանը ձայն է տվել Ավստրիայում բնակվող թուրքերի 62.5 տոկոսը։

Հիշեցնենք, որ նախագահական ընտրությունների նախնական տվյալներով՝ գործող նախագահ Ռեջեփ Թայիփ Էրդողանը ստացել է ձայների 52,6%-ը: