Իսպանիայի թագավորի փեսան նախընտրել է պատիժը կրել կանանց գաղութում

Իսպանիայի ինֆանտա Կրիստինայի ամուսինը՝ Ինյակի Ուրդանգարինը, որը դատապարտվել է կոռուպցիայի համար, ժամանել է բանտ, որտեղ պետք է կրի իր մոտ վեց տարվա պատիժը, հայտնում է «ՌԻԱ Նովոստի»-ն՝ վկայակոչելով Confidencial թերթին:

Ֆելիպե IV թագավորի փեսան կիրակի Ժնևից վերադարձել է Մադրիդ, իսկ հաջորդ առավոտյան ժամանել է Իսպանիայի մայրաքաղաքից 100 կիլոմետր հեռավորության վրա գտնվող Ավիլա քաղաքի «Բրիևա» բանտ: Նշվում է, որ Ուրդանգարինն ինքն է ընտրել երկրի ավելի քան 80 բանտերից հենց այս պատժիչ հաստատությունը:

Լրատվամիջոցի համաձայն՝ «Բրիևա»-ն կանանց գաղութ է հինգ սենյակով առանձին կորպուսով, բակով, ճաշարանով և հանդիպումների համար նախատեսված սենյակներով: Ուրդանգարինը պատիժը կկրի տղամարդկանց համար հատուկ հատվածում:

Իսպանիայի գերագույն դատարանը հունիսի 12-ին Noos կոռուպցիոն գործով վերջնական վճիռ էր կայացրել: Դատարանն Ինյակի Ուրդանգարինին դատապարտել է 5 տարի 9 ամիս ժամկետով ազատազրկման: Նա մեղավոր է ճանաչվել փողերի յուրացման, անձնական նպատակներով ծառայողական դիրքի օգտագործման, խարդախության, հարկերի վճարումից խուսափելու համար: