Կիմ Չեն Ընը Սինգապուր կժամանի իր ուտելիքով եւ ավտոմեքենաներով

Կիրակի Սինգապուր կժամանի Իլ-76 օդանավը, որում, հավանաբար, կլինի սննդամթերք Հյուսիսային Կորեայի առաջնորդ Կիմ Չեն Ընի համար, որը հունիսի 12-ին այնտեղ հանդիպում կանցկացնի ԱՄՆ նախագահ Դոնալդ Թրամփի հետ, հայտնում է The Straights Times պարբերականը:

«Չանգի» օդանավակայանում Հյուսիսային Կորեայից ժամանած օդանավին սառեցնող սարքերով բեռնատարներ կսպասեն՝ տեղափոխելու համար արագ փչացող մթերքները, հայտնում է պարբերականը:

Սպասվում է, որ օդանավով Սինգապուր կբերվեն նաեւ լյուքս դասի մի քանի ավտոմեքենաներ, հավանաբար՝ Mercedes Benz, որոնք կմտնեն Հյուսիսային Կորեայի առաջնորդի ավտոշարասյան մեջ: Ինքը՝ Կիմ Չեն Ընը, հավանաբար, կտեղաշարժվի BMW 7-ով, որն արդեն Սինգապուրում է:

Լրատվամիջոցների տեղեկություններով՝ Կիմ Չեն Ընը Սինգապուր կժամանի հունիսի 10-ին: Մինչեւ նրա ժամանումը, այնտեղ կգա հյուսիսկորեական պատվիրակությունը՝ կազմված ավելի քան 100 մարդուց:

Ենթադրվում է, որ նա Սինգապուր կժամանի Իլ-62-ով: Այսպիսի օդանավով էր մայիսին մեկնել Չինաստան: The Straights Times-ը նշում է, որ օդանավը բավականին հին է, եւ հավանաբար, ստիպված կլինի Պեկինում վայրէջք կատարել լիցքավորվելու համար:

Պարբերականի տեղեկություններով՝ Հյուսիսային Կորեայի առաջնորդը կարող է Սինգապուր ժամանել նաեւ Air China-ի օդանավով: